प्रधानमन्त्रीको निर्देशन- लेख्नूस्, बोल्नूस् र प्रतिक्रान्तिकारीको प्रतिवाद गर्नूस्

काठमाडौं । प्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले जनताले आन्दोलनबाट ल्याएको उपलब्धि तर्क-वितर्क गरेर उल्ट्याउने प्रयास भइरहेको भन्दै सचेत रहन आह्वान गरेका छन् ।

नयाँ वर्ष ०८० देखि कार्यकर्ता भेटघाट र पार्टी कामका लागि केन्द्रीय कार्यालय पेरिसडाँडाबाट गर्ने उद्घोष गरेसँगै शुक्रबार पहिलो भेटघाटमा प्रचण्डले संविधान सभामै उल्लेख भइसकेका र आत्मसाथ गरिसकेका कुरालाई अहिले तर्क-वितर्क गरेर असफल बनाउने र उल्ट्याउन खोज्ने प्रयास भइरहेको बताएका हुन् ।

प्रधानमन्त्री प्रचण्डले परिवर्तनलाई विचलनमा लैजाने काम भइरहेको भन्दै त्यसविरुद्ध सबै चनाखो भैराख्नुपर्नेमा जोड दिए । उनले आफ्नै नेतृत्वमा पार्टी सरकारमा रहेकाले परिवर्तन उल्टिँदैन जस्तो लागेपनि स्थिति सोचेजस्तो सहज भने नरहेको बताए । ‘संविधान सभाबाट भएको घोषणालाई आत्मसाथ गरियो । तर, अहिले त्यसलाई विभिन्न तर्क-विर्तक गरेर कसरी असफल र उल्ट्याउन सकिन्छ भन्ने कसरत ठूलै छ,’ उनले भनेका छन् ।

उनले अहिले पार्टी सरकारको नेतृत्वमा रहेको र मन्त्री, प्रधानमन्त्री आफैँ हुँदा पनि परिवर्तन उल्टिँदैन भन्नसक्ने अवस्था नरहेको बताए । ‘मैले सबै कमरेडहरूलाई बुझिनेगरी भन्न चाहन्छु, यो स्थिति सहज छैन । हामीले बुद्धि नपुर्‍याउने, थप चनाखो नहुने र संघर्ष नगर्ने हो भने धेरै अफ्ठ्यारो स्थिति आउन सक्छ,’ प्रधानमन्त्रीले भनेका छन् ।

प्रधानमन्त्री प्रचण्डले आगामी दिनमा माओवादी केन्द्रका नेताहरूको समर्थन लिएर नेतृत्व प्राप्त गर्ने प्रणाली बदल्नुपर्ने पनि बताए । उनले कार्यकर्ताको मन जित्ने मानिस नै नेता बन्ने प्रणालीको विकास गर्नुपर्ने भन्दै पार्टीका कुरा लिएर सिंहदरबार होइन, पेरिसडाँडा आउन सबैलाई आग्रह गरेका छन् ।

जत्तिसुकै चुनौती भएपनि वर्तमान सरकारलाई सफल बनाएरै छाड्ने आफूहरूले सङ्कल्प लिएको भन्दै प्रधानमन्त्री प्रचण्डले भने, “लेखौँ, बोलौँ र प्रतिक्रियावादी र प्रतिक्रान्तिकारीहरूको प्रतिवाद गरौँ  यसो भयो भने हामी सबैले आफ्नो भूमिका पूरा गरेको ठहर्छ ।”

उनले अगाडि थपे, ‘सरकारको नेतृत्व लिएपछि धेरै राम्रा कामहरू भएका छन् । त्यसमा केही सफल भइसके र केही सफल हुँदैछन् । सरकारलाई जनताको आशा र अपेक्षाअनुसार जनमुखी बनाउने ऐतिहासिक अवसर चुनौती र जिम्मेवारी पनि हाम्रै काँधमा छ ।’