एमाले–राप्रपा एउटै बाटोमा, संघीय सरकार छाडेर प्रदेशमा मौन

काठमाडौं। नेकपा एमालेले संघीय सरकार छाडे पनि प्रदेश सरकारको बारेमा तत्काल निर्णय नलिने भएको छ । यसअघि, सरकार छाडेको राप्रपाको पनि लाइन त्यही छ।

सोमबारको सचिवालय बैठकले समर्थन फिर्ता लिँदै सरकार छाड्ने र मन्त्रीको राजीनामा आजै बुझाउने भने पनि प्रदेश सरकारका विषयमा भने मौन बसेको छ। स्रोतका अनुसार प्रदेशमा तत्काल माओवादी लगायतका दलहरूसँगको सहकार्य नतोड्ने र सरकार पनि नछोड्ने रणनीति एमालेको देखिन्छ।

आकस्मिक रूपमा संघीय सरकारबाट बाहिरिने र सरकारलाई दिएको समर्थनसमेत फिर्ता लिने निर्णय गरेको पार्टी सचिवालय बैठकले प्रदेश सरकारका विषयमा भने कुनै नयाँ निर्णय लिएन । यसको मतलब प्रदेश सरकारबारे पर्ख र हेरको अवस्थामा एमाले रहेको छ।

बैठकपछि प्रतिक्रियादिँदै एमाले उपाध्यक्ष अष्टलक्ष्मी शाक्यले प्रदेश सरकारका विषयमा कुनै निर्णय नभएको बताइन्। एमालेबाट हाल प्रदेश १ मा हिक्मत कार्की, गण्डकीमा खगराज अधिकारी र लुम्बिनीमा लिला गिरी मुख्यमन्त्री छन्।

सुदूरपश्चिमको मुख्यमन्त्रीले भने विश्वासको मत नै नपाई सरकार छाड्नुपरेको थियो । एमाले सुदूरपश्चिम सरकारमा अहिले सहभागी छैन। मधेस प्रदेश, बागमती प्रदेश र कर्णली प्रदेश सरकारमा एमालेका मन्त्रीहरू छन्।

यसैगरी, राप्रपाले पनि केन्द्र सरकार र बागमती प्रदेश सरकार छाडेको छ । तर,प्रदेश १, गण्डकी र लुम्बिनी सरकारका मन्त्री यथावत् छन्।