सभामुखमा एमालेका देवराज घिमिरेले उम्मेदवारी दिने निश्चित

काठमाडौं। प्रतिनिधि सभाको सभामुखमा सत्ता साझेदार दलका तर्फबाट एमालेका देवराज घिमिरेले उम्मेदवारी दिने निश्चित भएको छ ।

एमालेसहित माओवादी केन्द्र, रास्वपा र राप्रपाका नेताबीच भएको यसअघिको सहमतिअनुसार घिमिरेलाई सभामुखको उम्मेदवार बनाउन लागिएको एमाले उपाध्यक्षसमेत रहेका नेता सुवास नेम्वाङले बताए ।

झापा २ बाट प्रतिनिधि सभा सदस्यमा निर्वाचित घिमिरेलाई सत्ता साझेदार दलका तर्फबाट सभामुखको उम्मेदवार बनाउन लागिएको हो ।

एमाले अध्यक्ष ओली र माओवादी केन्द्रका अध्यक्ष प्रचण्डबीच राष्ट्रपति एमालेले पाँच वर्ष पूरै कार्यकालका लागि लिने तथा प्रधानमन्त्री र सभामुख आलोपालो दुवै दलले नेतृत्व गर्ने सहमति भएको थियो ।

सहमति अनुसार माओवादीबाट प्रधानमन्त्री भइसकेकाले सभामुखमा पहिलो कार्यकाल एमालेले लिनेगरी घिमिरेलाई उम्मेदवार बनाउन लागिएको हो ।

यसअघि, एमालेबाट सभामुखका लागि उपमहासचिव पृथ्वी सुब्बा गुरुङ, सचिव छविलाल विश्वकर्मा र नेतृ विद्या भट्टराईले आकांक्षा राखे पनि एमाले अध्यक्ष ओलीले घिमिरेलाई अगाडी सारेका हुन् ।

अध्यक्ष ओलीले घिमिरेलाई सभामुख बनाउने तयारी गरेको यसअघि नै नेपाल भ्युजले  खुलासा गरेको थियो ।

सभामुखमा एमालेका तीन दाबेदार, झापाका घिमिरेलाई बनाउने अध्यक्ष ओलीको योजना !