जनकपुरधाम। आज बिहानदेखि सम्पर्कविहीन भएको तारा एयरको विमानमा धनुषाका एकै परिवारको सातजना रहेको पुष्टि भएको छ।
पोखराबाट जोमसोमको लागि उडेको तारा एयरको जहाज १० बजेर ७ मिनेटदेखि सम्पर्कविहीन बनेको थियो।
तारा एयरका अनुसार उक्त विमानमा चालकदलका तीन सदस्यसहित २२ जना सवार थिए। तीमध्ये धनुषा मिथिला नगरपालिका-११ लोटा गाउँका सात जना रहेको पुष्टि भएको छ।
विमानमा राजनकुमार गोले, उनका बुवा इन्द्रबहादुर गोले, आमा राममाया तामाङ, काका पुरुषोत्तम गोले, काकी तुलसादेवी तामाङ, मामा मकरबहादुर तामाङ र माइजु सुकुमाया तामाङ रहेको परिवारजनले पुष्टि गरेका हुन्।
उनीहरू मुक्तिनाथ दर्शनका लागि विमानबाट जोमसोम जाँदै थिए। विमान बेपत्ता भएको खबरले परिवारमा रुवाबासी चलेको छ भने सारा गाउँमा नै चिन्तित बनेको छ।
एकै परिवारका ७ जना विमानसँगै हराएपछि अहिले राजनका घरमा स्थानीय र आफन्त पुगेर सान्त्वना दिइरहेका छन्। सम्पर्कविहीन भएको जहाजमा १३ नेपाली, ४ भारतीय, २ जर्मन नागरिक र चालकदलका तीन सदस्यसहित २२ जना सवार छन्।
Facebook Comment
Comment