एमालेको ‘लालकिल्ला’ हेटौँडामा राप्रपाको मतले तरङ्ग

हेटौँडा। राष्ट्रिय प्रजातन्त्र पार्टीले हेटौँडामा पाएको मतले तरङ्ग ल्याएको छ। जारी मतगणनामा राप्रपाले पाएको लोकप्रिय मत देखेर दलहरु झस्किएका छन्।

हेटौँडाको तीन ओटा वडाको मतगणना सकिसक्दा मेयरमा राप्रपाका दीपकबहादुर सिंह अग्रतामा रहँदा हेटौँडालाई आफ्नो ‘लालकिल्ला’ मान्ने एमाले भने तेस्रो स्थानमा पुगेको छ।

यसअघिको तीन ओटा स्थानीय तह निर्वाचनमा विजयी भएको एमालेले यो पटक पनि इतिहास दोहोरिने दाबी गरे पनि यही गतिमा राप्रपाको मत बढ्दै जाने हो भने राप्राले नयाँ इतिहास रच्ने सम्भावना बढेकाे छ।

अहिले गणना भइरहेको हेटौँडाको वडा नम्बर ४, ५, ६ मा राप्रपाको अग्रता देखिएको छ। यसले पनि एमालेको लालकिल्ला मानिएको हेटौँडामा राप्रपाको उदय हुने संकेत देखाउँछ। पाँच दलीय गठबन्धनलाई समेत राप्रपाले कडा चुनौती दिएको छ।

हेटौँडामा गणना सकिएको वडा नम्बर १ बाट राप्रपाका मेयर उम्मेदवारले ९९७ मत प्राप्त गरेका छन्। सोही वडामा गठबन्धनले ९७२ र एमालेले ८५६ मत प्राप्त गरेको छ। हेटौँडा–२ मा राप्रपाका मेयर उम्मेदवार सिंह थप बलियो देखिए। वडा नम्बर २ बाट सिंहले १६५४ मत पाउँदा गठबन्धनले ६४९ र एमालेले ५९२ मत मात्रै पाएको छ। यो वडा सिंहको आफ्नै वडा हो।

राप्रपाको यो मतलाई दलहरुले अस्वभाविक माने पनि यो आफ्नो दलभित्रको असन्तुष्टि सम्बोधन गर्न नसक्नुको परिणाम हो। मत खसेको शैली अध्ययन गर्दा पनि मेयरमा हलो र अन्य पदमा आफ्नो उम्मेदवारलाई मत दिएको धेरै मतपत्र भेटिएको छ। आफ्नो दलले उठाएका उम्मेदवारहरुप्रतिको असन्तुष्ट मत राप्रपाले तानेको हो।

‘‘राप्रपाको यस्तो मत आउँछ भन्ने हामीले पहिले नै आकलन गरेका थियाैँ,” राप्रपाका एक नेताले भने, ‘‘अन्य दलका असन्तुष्ट नेता कार्यकर्ताहरुले हामीलाई दिएको मतको परिणाम अहिले देखिएको हो। हामीले केही नेता कार्यकर्ताहरुसँग कुराकानी पनि गरेका थियौँ।’’