अमेरिकामा ज्यान गुमाएका शाहको परिवारलाई बीमा रकम हस्तान्तरण

नेपालभ्युज

काठमाडौं । अमेरिकाको न्यूजर्सी राज्यमा ज्यान गुमाएका विष्णु शाहको परिवारलाई बीमा बापतको रकम उपलव्ध गराइएको छ ।

मृतक शाहको परिवारलाई बीमा बापतको २ लाख ५६ हजार ५ सय ६२ अमेरिकी डलर (तीन करोड तेत्तीस लाख बराबरको नेपाली रुपैयाँ) हस्तान्तरण गरिएको न्यूयोर्क लाइफ इन्स्योरेन्स कम्पनीका वित्तीय इन्स्योरेन्स एजेन्ट जनक भण्डारीले जानकारी दिए ।

भण्डारीका अनुसार शाहले न्यूयोर्क लाइफ इन्स्योरेन्स कम्पनीमा गराएको जीवन बीमा बापतको रकम नेपालमा रहेकी उनकी श्रीमती मिना शाहलाई उपलब्ध गराएको हो ।

रुकुम पूर्वको सिस्ने गाउँपालिका, ६ स्थायी घर भएका शाहको हृदयाघातका कारण अमेरिकामा १७ जनवरी २०२३ मा निधन भएको थियो ।

९ वर्ष अगाडि अमेरिका पुगेका शाहको परिवार हाल दाङको घोराही नगरपालिका, १५ मा बस्दै आएको छ ।