प्रहरी इञ्चार्ज पौडेलको मृत्यु भएको घटनामा आमा छोरा पक्राउ

गलकोट । होटलमा मृत फेला परेका प्रहरी वरिष्ठ नायब निरीक्षक उज्ज्वल पौडेलको घटनामा अनुसन्धानका लागि बागलुङ प्रहरीले दुई जनालाई पक्राउ गरेको छ ।

बागलुङको बडिगाड गाउँपालिकास्थित इलाका प्रहरी कार्यालय भीमगिठेका इञ्चार्ज पौडेल मृत फेला परेको स्थानका होटल सञ्चालिका आशा कुँवर र उनका छोरा विनोद कुँवरलाई अनुसन्धानका लागि नियन्त्रणमा लिएको प्रहरी उपरीक्षक योगेन्द्रकुमार खड्काले जानकारी दिए।

प्रहरीले घटना शङ्कास्पद देखिएको बताएको छ । पौडेलको शव परीक्षणका लागि बागलुङ बजार ल्याउने तयारी थालिएको छ ।

आशा होटल एण्ड खाजा घरमा पौडेल गएराति मृत फेला परेका थिए । प्रहरीले घटनाका विषयमा अनुसन्धानपछि मात्रै वास्तविकता बताउने जनाएको छ ।

प्रहरी उपरीक्षक खड्काले भने, ‘प्रहरी गहिरो अनुसन्धानमा छ, प्रहरी इञ्चार्जको नै यस्तो अवस्था हुनु निकै दुःखद् हो, घटना शङ्कास्पद देखिन्छ ।’