विराटनगर। कोशी प्रदेशमा मुख्यमन्त्रीमा दाबी गर्ने आज अन्तिम दिन हो ।
एमालेको तर्फबाट मुख्यमन्त्री बनेका हिक्मतकुमार कार्की पदमुक्त भएपछि प्रदेश प्रमुख पर्शुराम खापुङले बहुमतसहित सरकारको दाबी गर्न दिएको समय आज सकिँदैछ ।
अहिलेको गठबन्धन अनुसार कोशी प्रदेशमा कुनै पनि पक्षसँग बहुमत छैन । ६ सिट भएको राप्रपालाई नेपाली कांग्रेसले फकाएपनि अहिलेसम्म राप्रपाले जवाफ दिएको छैन ।
तर सभामुख बाबुराम गौतमलाई समेतलाई जोडेर नेपाली कांग्रेस संसदीय दलका नेता उद्धव थापालाई मुख्यमन्त्रीमा अघि सार्ने गठबन्धनको तयारी छ ।
माओवादी केन्द्र, एकीकृत समाजवादी पार्टी र जसपाको समर्थनमा कांग्रेस संसदीय दलका नेता उद्धव थापाले दाबी पेश गर्ने तयारी गरेका हुन् ।
राप्रपाले समर्थन नगरे मुख्यमन्त्री नियुक्त भएपनि विश्वासको मत नपाउने अवस्था छ । ९३ सदस्यीय प्रदेश सभामा बहुमतका लागि ४७ मत आवश्यक पर्छ । कोशीमा गठबन्धन दल कांग्रेसको २९, माओवादीको सभामुखसहित १३, नेकपा एसको ४ र जसपाको १ गरी ४७ मत नै छ ।
विश्वासको मत प्रयोजनका लागि बराबरी भएको अवस्थामा मात्रै सभामुखले निर्णायक मत दिन पाउँछन् ।
Facebook Comment
Comment