काठमाडौं। नेपाल ट्रेड युनियन कांग्रेसको अध्यक्षमा संस्थापन पक्षमा उम्मेदवार योगेन्द्रबहादुर कुँवर निर्वाचित भएका छन् । संस्थापनइतर समूहका उम्मेदवार महेन्द्र यादवलाई पराजित गर्दै कुँवर निर्वाचित भएका हुन् । बिहीबार दिउँसो सार्वजनिक मतपरिणामअनुसार निर्वाचित कुँवरले ४४१ मत प्राप्त गरे भने यादवले ३ सय ७६ मत पाएका छन्।
त्यस्तै, वरिष्ठ उपाध्यक्षमा भने संस्थापनइतरका तेजेन्द्रजंग कार्की निर्वाचित भएका छन् । उनले संस्थापन पक्षका अयोध्याप्रसाद यादवलाई पराजित गरेका हुन् ।
खुला उपाध्यक्षमा गणेशबहादुर केसी, महिला उपाध्यक्षमा राधिका कुइँकेल खनाल, सेवा क्षेत्रतर्फको उपाध्यक्षमा नेत्रविक्रम थापा, उत्पादन क्षेत्रतर्फको उपाध्यक्षमा ललितबहादुर श्रेष्ठ र अनौपचारिक तथा स्वरोजगार क्षेत्रको उपाध्यक्षमा राजेश पालिखे निर्वाचित भएका छन् भने महासचिवमा अजय कुमार राई निर्वाचित भएका छन् ।
राईले संस्थापन पक्षका डीपी अर्याललाई पराजित गरेका हुन्।
कोषाध्यक्षमा सञ्जयकुमार दाहाल निर्वाचित भएका छन् भने खुलातर्फको उपमहासचिवमा जनार्दन भट्टराई र बलदेव तामाङ तथा महिला उपमहासचिवमा सुशीला घिमिरे निर्वाचित भएका छन् ।
Facebook Comment
Comment