एमाले नेता चौलागाईं मृत फेला

नेपालभ्युज

काठमाडौं। नेकपा एमालेका काठमाडौं जिल्ला सदस्य पुण्यप्रसाद चौलागाईं मृत फेला परेका छन्। सिन्धुपाल्चोक स्थायी घर भएका चौलागाईं पछिल्लो समय गोकर्णेश्वरमा बस्ने गरेका थिए ।

उनी २०७४ सालको स्थानीय तहको निर्वाचनमा नेकपा एमालेको तर्फबाट मेयरका प्रत्यासी थिए । चौलागाईंलाई नेपाली कांग्रेसका नेता सन्तोष चालिसेले हराएका थिए । चालिसे अहिले काठमाडौं-३ को संघीय सांसद छन्।

शुक्रबार काठमाडौंको शंखरापुरा–६,साँखुस्थित सलम्बुको जङ्गलमा चौलागाईं मृत अवस्थामा फेला परेको प्रहरीले जनाएको छ । यस बारेमा थप अनुसन्धान भइरहेको प्रहरीको भनाइ छ।

बिहीबार दिउँसो २ बजेदेखि परिवारको सम्पर्कमा नरहेका चौलागाईंले विष सेवन गरेको र साथमा ‘सुसाइट नोट’ समेत भेटिएको बताइएको छ ।

चौलागाईंको शव अहिले महाराजगञ्जस्थित त्रिवि शिक्षण अस्पतालमा रहेको स्थानीय एमाले नेताले जानकारी दिए।