सांसद भण्डारीलाई एम्बुलेन्समा विमानस्थल लगियो (तस्वीरहरू)

काठमाडौं। नेपाली कांग्रेसका नेता डा. चन्द्र भण्डारीलाई थप उपचारका लागि भारत लैजान कीर्तिपुरस्थित बर्न अस्पतालबाट त्रिभुवन अन्तर्राष्ट्रिय विमानस्थल लगिएको छ ।

बुधबार राति जलेर घाइते भएका भण्डारीलाई थप उपचारका लागि भारतको मुम्बई लैजानका लागि कीर्तिपुर अस्पतालबाट एम्बुलेन्समा राखेर विमानस्थल लगिएको छ। केहीबेरमा श्री एयरको एयर एम्बुलेन्स मार्फत उनलाई मुम्बई लैजाने तयारी छ ।

भण्डारीलाई त्यहाँको नेसनल वर्न सेन्टरमा उपचार गरिने स्वास्थ्य तथा जनसंख्या मन्त्रालयले जानकारी दिएको छ । उनको उपचार टिममा डा. प्रदीप तिवारी (क्रिटिकल केयर हेड), डा. बृहस्पति (एनेस्थेसिया एन्ड क्रिटिकल केयर), डा. रोशन शर्मा, (फ्लाइट डाक्टर ईएमएस) सहभागी रहने मन्त्रालयले जनाएको छ ।

त्यस्तै, दिनेश राई (प्यारामेडिक्स इआर), सागर महर्जन (प्यारामेडिक्स इआर) र राज तामाङ (प्यारामेडिक्स ईआर) पनि उपचार टोलीमा रहेका छन् ।