काठमाडौं। नवौं राष्ट्रिय खेलकुदको महिला क्रिकेटमा लगातार तेस्रो जित निकाल्दैँ नेपाल पुलिस क्लब फाइनल पुगेको छ । सोमबार भएको खेलमा पुलिसले बागमतीलाई ३६ रनले पराजित गरेको हो ।
टस जितेर बागमतीले पहिले फिल्डिङ रोजेसँगै पुलिस ब्याटिङमा उत्रियो । पुलिसले २० ओभरमा ४ विकेट गुमाएर १२३ रन बनायो । उसको लागि काजल श्रेष्ठले ४६ र कविता कुँवरले २६ रन बनाइन् । बागमतीका लागि अस्मिना कर्मचार्य, खुसी डङ्गोल र सुमन खतिवडाले १–१ विकेट लिए ।
१२४ रनको लक्ष्यमा जवाफी ब्याटिङ गरेको बागमतीले २० ओभरमा ८ विकेट गुमाएर ८७ रन बनायो । उसको लागि सुमनले २३ र अस्मिनाले १८ रन बनाए । नेपाल पुलिसका लागि कबिता कुँवरले ३, ईश्वरी विष्टले २ तथा रुबिना क्षेत्री र संगीता राईले १–१ विकेट लिए । ईश्वरीले एक ओभरमा नै २ विकेट लिए । उनले ४ ओभरको दोस्रो र अन्तिम बलमा २ विकेट लिए ।
यससँगै उपाधिका लागि नेपाल पुलिस र एपीएफ फाइनलमा भिड्ने भएका छन् । तेस्रो स्थानका लागि भने लुम्बिनी र बागमती भिड्ने छन् । यसअघि भएको खेलमा एपीएफले लुम्बिनीलाई ६७ रनले पराजित गर्दै फाइनलमा पुगेको थियो ।
Facebook Comment
Comment