ट्राफिक नियम उल्लंघन गर्नेबाट दुई करोड राजस्व संकलन

नवलपुर। ट्राफिक नियम उल्लंघन गर्ने चालाकलाई गरिएको कारबाहीबाट नवलपरासी (बर्दघाट–सुस्तापूर्व)स्थित जिल्ला ट्राफिक प्रहरी कार्यालयले दुई करोडभन्दा बढी राजस्व संकलन गरेको छ।

आर्थिक वर्ष २०७८/७९ मा ट्राफिक नियम उल्लंघन गर्ने चालकलाई गरिएको कारबाहीमा ट्राफिक प्रहरीले दुई करोड ११ लाख ८१ हजार ५०० रुपैयाँ राजस्व संकलन गरेको हो।

गत आर्थिक वर्षमा ३१ हजार १९३ चालकलाई कारबाही गरिएको प्रमुख प्रहरी निरीक्षक प्रदीप थापाले बताए। जिल्लामा ट्राफिक नियमको उल्लंघन गर्ने सवारी साधनमध्ये सबैभन्दा बढी ट्रक र दोस्रो नम्बरमा मोटरसाइकल रहेका उनले बताए। १ साउन २०७८ देखि ३२ असार २०७९ सम्म ११ हजार ७५३ ओटा ट्रक चालक कारबाहीमा परेका थिए।

ट्राफिक नियम उल्लंघन गरी कारबाहीमा परेका ट्रक चालकबाट ट्राफिक प्रहरीले जरिवानाबापत ८४ लाख १५ हजार ५०० रुपैयाँ राजस्व संकलन गर्न सफल भएको थापाले जानकारी दिए।

त्यस्तै, सोही अवधिमा ११ हजार ७१ मोटरसाइकल चालक कारबाहीमा पर्दा ७७ लाख ५६ हजार ५०० रुपैयाँ र दुई हजार ११२ यात्रुवाहक बसलाई कारबाही गर्दा १२ लाख ८१ हजार रुपैयाँ जरिवाना असुल भएको प्रमुख प्रहरी निरीक्षक थापाले बताए।

चार हजार ४१४ हलुका सवारी साधन (जिप, कार तथा भ्यान) चालकबाट २५ लाख ८३ हजार ५०० रुपैयाँ र एक हजार ७४३ ट्र्याक्टर चालकबाट ११ लाख ४५ हजार रुपैयाँ जरिवाना असुल गरिएको थियो।

जिल्लामा गत आव २०७८/७९ मा १२३ ओटा सवारी साधन दुर्घटनामा परेका र त्यसमा ३९ जनाले ज्यान गुमाएका थिए भने २३९ सख्त घाइते भएका थिए।