इलाम। इलाममा चियाको पहिलो टिपाइ सुरु भएको छ। पहिलो टिपाइलाई ‘फस्ट फल्स’ समेत भनेर चिनिने पहिलो टिपाइ अन्य सिजनभन्दा गुणस्तरीय चिया मानिन्छ।
जिल्लाको तल्लो क्षेत्रमा चियाको मुना पलाउन थालेसँगै टिपाइ सुरु भएको हो। माथिल्लो क्षेत्रमा भने चिया पलाउन सुरु मात्र भएको छ। दुई पात एक सुइरो भएको चिया टिप्न सबैभन्दा राम्रो मानिन्छ।
गएको कात्तिकदेखि बाँझी बसेको चिया पुनःपलाउन थालेसँगै चिया टिपाइ सुरु भएको हो। यससँगै जिल्लाका चिया कारखानाले प्रशोधनको तयारीसमेत थालेको बताइएको छ। केही कारखानाले उत्पादनसमेत सुरु गरेका छन्।
यसरी केही समयसम्म फुर्सद रहेका चिया तथा कारखाना मजदूरको कार्य व्यस्तता अहिले ह्वात्तै बढेको छ। पहिलो उत्पादन गुणस्तरीय हुने भएकाले बजारमा पहुँच बढाउनसमेत चियापत्तीको टिपाइ छिट्टै थालिएको हो। यस वर्ष मौसमले पनि चिया किसानलाई साथ दिएको छ।
यस वर्ष समयमा नै पानी परेकाले चिया किसानसमेत हर्षित छन्। जिल्लाका लेकाली क्षेत्रमा भने अझै पूर्णरुपमा चिया पलाउन सकेको छैन। गर्मी बढेका क्षेत्रमा चियापत्ती टिप्न सुरु गरिएको हो। उत्पादन कम भए पनि फस्ट फ्लस चियाको मूल्य उच्च हुने भएकाले किसानले छिट्टै चियापत्ती टिपाइ सुरु गरेका हुन्।
Facebook Comment
Comment