राष्ट्र र जनताको हितमा भए सबै मुलुकको सहयोग स्वीकार गर्नुपर्छ : नेता सिंह

काठमाडौं। नेपाली कांग्रेसका नेता प्रकाशमान सिंहले जुन सुकै छिमेकी मुलुकले राष्ट्र र जनताको हितमा दिने सहयोग लिन सकिने बताएका छन्। उनले कांग्रेसले देश र जनताको हितविपरीतका सहयोग अस्वीकार गर्ने पनि प्रष्ट पारे।

राजनीति मुलुक र जनताको हितलाई ध्यानमा राखेर गर्ने कुरामा आफू प्रष्ट रहेको बताउँदै सिंहले एमसीसीको विषयमा फैलिएको नकारात्मक हल्लाको पछि नलाग्नसमेत आग्रह गरेका छन्।

काठमाडौंको प्रतिनिधिसभा निर्वाचन क्षेत्र नं १ मा ‘घर घर जाउँ, कांग्रेस जिताउँ’ अभियान अन्तरगत बुद्धनगरमा आयोजित कार्यक्रममा बोल्दै नेता सिंहले कम्युनिष्ट पार्टीका दोधारे कुराले नागरिकमा गलत सन्देश गएको बताए। उनले त्यस्ता गलत हल्लाको विषयमा नागरिक सामु गएर बुझाउनु पर्ने बताए।

कम्युनिष्ट नेताहरु जनतासामु एउटा र अन्तर्राष्ट्रिय जगतमा अर्को कुरा गर्न माहिर रहेको कुरा सबैले थाहा पाउनुपर्ने समेत सिंहले बताए। चुनाव नजिक आइसकेकाले भ्रमको खेती गर्नेहरुका बारेमा मतदाताका घरघरमा पुगेर वास्तविकता बुझाउने उन ले बताए।

सिंहले कांग्रेसको नेतृत्वमा आजसम्म भएका उपलब्धीहरु जनतालाई बुझाएर कांग्रेसको पक्षमा मत माग्नसमेत कार्यकर्तालाई आग्रह गरे। कांग्रेसजनमा आफूले थाहा पाएपछि सबैले थाहा पाउँछन् भन्ने परेकाले त्यो भ्रम त्यागेर जनता बीचमा ठीक विचार र सूचना पुर्याउन अल्छी नगर्न निर्देशन दिए।

अरु पार्टीले कामै नगरे पनि काम गरेको भ्रम बेचिरहेको भन्दै नेता सिंहले कांग्रेसले आफूले गरेका कामको सही प्रचारसमेत गर्न नसकेको अवस्थामा प्रचारप्रसारमा लाग्न समेत निर्देशन दिएका छन्।

चुनाव नजिकिँदै गर्दा टिकटको आशा राख्नु जायज भए पनि उम्मेदवार हुन र टिकट पाउन पार्टीको वैधानिक प्रक्रिया सबैले पालना गर्नुपर्ने सिंहको भनाइ छ ।

सिंहले समय धेरै नभएकाले घरघर, टोल–टोलमा गएर कांग्रेसका उम्मेदवार र कांग्रेसलाई विजयी गराउन लाग्नुपर्ने समेत बताए।