गुञ्जीमा भारतको मनोमानी : सय फिट अग्लो झण्डा राख्दै, रोकिएन महाकालीमा तटबन्ध निर्माण

धनगढी। दार्चुलास्थित नेपाली भूमि गुञ्जीमा भारतले आफ्नो झण्डा राख्ने भएको छ। भारतले गुञ्जीमा ४५ लाख खर्चेर एक सय फिट अग्लो झण्डा राख्न लागेको भारतीय सञ्चार माध्यम अमर उजालाले लेखेको छ।

भारत, चीन र नेपालको सीमासँगै समुद्र सतहबाट करीब ३२ सय मिटर अग्लो स्थानमा रहेको गुञ्जीमा एक सय फिट अग्लो झण्डा लहराइने भन्दै अमर उजालाले लेखेको छ।

७ जेठ २०७७ मा नेकपा एमालेका अध्यक्ष केपी शर्मा ओली नेतृत्वको सरकारले भारतले अतिक्रमण गरेको नेपाली भूमि लिम्पियाधुरा, लिपुलेक र कालापानी समेटेर नयाँ नक्सा सार्वजनिक गरेको थियो। उक्त नक्सामा भारतले अतिक्रमण गरेको नाभी, कुटी र गुञ्जी गाउँ समेटिएका छन्।

यस विषयमा जिल्ला प्रशासन कार्यालय दार्चुलाका प्रमुख जिल्ला अधिकारी दीर्घराज उपाध्यायले आफूलाई कुनै जानकारी नभएको बताए। उनले गुञ्जी नयाँ नक्सा अनुसार नेपाली भूमिमा पर्ने र त्यहाँ भारतको कुनै अधिकार नभएको समेत बताए।

“यस विषयमा हामीलाई कुनै जानकारी छैन। नेपाली भूमिमा राख्न पाइँदैन,” प्रजिअ उपाध्यायले भने, “र, यदि त्रिदेशीय नाकामा त्यस्तै खालको झण्डा राख्ने हो भने प्रशासनलाई जानकारी गराउनुपर्छ।”

झण्डा राख्ने तयारीसँगै भारतले खलङ्गा नजिकै महाकालीमा करीब एक किलोमिटर तटबन्ध निमार्ण गरिसकेको छ। जिल्ला प्रशासनले पहल गरे पनि अझै निमार्ण कार्य नरोकिएको प्रजिअ उपाध्यायले बताए।

भारतले एकतर्फी रुपमा तटबन्ध बनाए महाकालीले नेपालतर्फ ठूलो क्षति गर्न सक्ने खतरा रहेको पनि उपाध्यायले बताए।