बर्दिबासमा मोटरसाइकल दुर्घटना हुँदा एकजनाको मृत्यु

नेपालभ्युज

जनकपुरधाम। महोत्तरीको बर्दिबासमा मोटरसाइकल दुर्घटना हुँदा एकजनाको मृत्यु भएको छ।

इलाका प्रहरी कार्यालय बर्दिवासका अनुसार बर्दिबास नगरपालिका वडा नं ४ मा मोटरसाइकल दुर्घटना हुँदा सर्लाही ईश्वरपुर नगरपालिका –४ भक्तिपुर बस्ने ४८ वर्षीय भुवनप्रसाद उपाध्यायको मृत्यु भएको हो।

पूर्व–पश्चिम राजमार्गअन्तर्गत माइस्थान चोकमा पूर्वबाट पश्चिमतर्फ जाँदै गरेको ज ६ प ८३४२ नम्बरको मोटरसाइकल शनिबार दिउँसो ३ बजेतिर अनियन्त्रित भएर दुर्घटना भएको थियो।

बर्दिबासस्थित शुभ–स्वस्तिक अस्पतालमा उपचारको लागि ल्याउँदा चिकित्सकले उपाध्यायलाई मृत घोषणा गरेका थिए । अहिले उनको शव अस्पतालमा नै रहेको प्रहरीले जनाएको छ।