सुदूरपश्चिमका थप १२ जनामा कोरोना पुष्टि

नेपालभ्युज

काठमाडौं। सुदूरपश्चिम प्रदेशमा आज थप १२ जनामा कोरोना भाइरस सङ्क्रमण पुष्टि भएको छ। गएको २४ घण्टामा प्रदेशभर पीसीआर र एन्टिजेन विधिबाट ७०४ जनाको नमूना परीक्षण गर्दा १२ जनामा सङ्क्रमण पुष्टि भएको स्वास्थ्य निर्देशनालयले जनाएको छ।

विगत २४ घण्टामा कोरोनाले सुदूरपश्चिममा कसैको मृत्यु भने भएको छैन। पीसीआर विधिमार्फत सात र एन्टिजेन विधिमार्फत पाँच जनामा कोरोना देखिएको हो।

पीसीआरमार्फत सेती प्रादेशिक अस्पतालमा चार र महाकाली अस्पताल तीन जनामा कोरोना पुष्टि भएको छ। एन्टिजेनमार्फत कञ्चनपुरका चार र कैलालीका एक जनामा सङ्क्रमण देखिएको हो।

यसअघि बिहीबार यस प्रदेशमा सात जनामा सङ्क्रमण पुष्टि हुँदा चार जना निको भएका थिए। सुदूरपश्चिममा सङ्क्रमणका कारण हालसम्म कुल ६१४ जनाको ज्यान गइसकेको छ।