चुनाव हुन नदिने ओलीको रणनीति

काठमाडौं। नेकपा अध्यक्ष केपी शर्मा ओली चितवनमा जारी एमालेको १० औँ महाधिवेशनकै क्रममा गत मंगलबार सम्पादकहरूसँग अन्तर्क्रिया कार्यक्रम गरे। उक्त अन्तर्क्रियामा उनले कसैलाई पनि उम्मेदवारी दिन र फिर्ता लिन दबाब नदिने बताएका थिए। आफू एमालेको अध्यक्ष भएकाले जसले जित्यो त्यही आफ्नो महासचिव र वरिष्ठ उपाध्यक्ष हुने र मन परेको/नपरेको, नजिकको/टाढाको नछुट्ट्याउने उनको भनाइ थियो।

तर यथार्थमा भने ओलीले चुनाव हुन नदिने रणनीति बनाएका छन्। शुक्रबार महाधिवेशनको उद्घाटन सत्रपछि आफू निकट नेताहरूसँग छलफल गरेका उनी शनिबार विहानैदेखि सहमतिका लागि छलफलमा जुटे। अध्यक्षमा उम्मेदवारी दिने घोषणा गरेका भीम रावल पक्ष छुट्टै छलफलमा जुटिरहँदा यता अध्यक्ष ओलीले आफूनिकट पक्षसँग छलफल गरेका थिए।

नयाँ नेतृत्वका लागि आज निर्धारित निर्वाचनमा वरिष्ठ उपाध्यक्षमा सुबास नेम्वाङ र ईश्वर पोखरेलले उम्मेदवारी दिने तयारी गरेकोमा विष्णु पौडेल र शंकर पोखरेल महासचिवमा उठ्ने तयारीमा थिए। ओलीले नेम्वाङलाई उपराष्ट्रपति बनाउने प्रस्ताव गरे पनि नेम्वाङ उक्त प्रस्तावमा सहमत भएनन्। अध्यक्षमा रावलले नछाड्दा निर्वाचन हुने भएपछि वरिष्ठ उपाध्यक्षमा किन चुनाव नगर्ने भन्ने मनस्थितिमा उनी देखिन्छन्। अध्यक्षमा रावलले ओलीलाई समर्थन गरेमा भने उनी वरिष्ठ उपाध्यक्षबाट पछि हट्न तयार देखिएको उनी निकटस्थ नेताहरूबाट बुझिएको छ।

यस्तै उपमहासचिव पदमा प्रदीप ज्ञवालीको मात्रै चर्चा रहेकोमा पृथ्वीसुब्बा गुरुङ र यसअघि सचिवमै दोहोरिने बताएका नेता योगेश भट्टराईले पनि आकांक्षा देखाएका छन्। तर यी दुवैले यस विषयमा सार्वजनिक रूपमा कुनै धारणा राखिसकेका भने छैनन्। यस्तै सचिवमा शिवकुमारी तुम्बाहाम्फे, गोकर्ण विष्ट, गोकुल बास्कोटा, महेश बस्नेत लगायतका नेताहरू आकांक्षी देखिएका छन्।

सर्वसम्मतका लागि प्रयास गरे पनि करीब चार घण्टा लामो छलफलमा सहमति हुन सकेन र आज तय भएको बन्द सत्र साढे तीन घण्टा ढिलो गरी मात्रै शुरु भएको छ। शनिबार विहान १० बजे बन्द सत्र शुरु गर्ने तयारी गरिएकोमा नयाँ नेतृत्वका आकांक्षीबीच सहमति जुट्न नसक्दा २ बजेपछि मात्रै बन्द सत्र शुरु हुन पुग्यो।

सहमति भइसकेको भन्दै बन्द सत्रमा प्रवेश गरेका ओलीले सम्बोधनका क्रममा पनि सहमतिमै जोड दिए। बन्द सत्रअघि सहमतिको प्रयास विफल भएपछि सम्बोधनमा ओलीले सहमतिमा निकै जोड दिएका थिए। सहमतिकै लागि भनेर बन्द सत्र परिसरमा ओली निकट कार्यकर्ताहरूले नारा समेत लगाएका थिए।

उनले प्रतिस्पर्धा प्रतिद्वन्द्वीसँग हुने भन्दै सहमतिमै अघि बढ्नुपर्नेमा जोड दिए। सिंगो देशले आफूहरूलाई हेरिरहेकाले अरुभन्दा फरक देखिन पनि सहमतिमा जानुपर्ने उनको भनाइ छ।

ओलीले बिहीबार चितवन आएदेखि नै निरन्तर सहमतिको प्रयास गरेता पनि अहिलेसम्म सहमति हुन भने सकेको छैन।

अध्यक्ष ओलीले सहमतिका लागि गरेको सिंगो कसरत ‌आफ्नो प्रतिद्वन्द्वी छैन भन्ने देखाउनका लागि भएको देखिन्छ।