राज्य संयन्त्र नै स्वतन्त्र न्यायालयको दुरुपयोगमा लागेको छ : ओली

चितवन। नेकपा एमालेका अध्यक्ष केपी शर्मा ओलीले स्वतन्त्र न्यायालयको दुरुपयोग भएको बताएका छन्। चितवनमा जारी एमालेको १० औँ महाधिवेशनको बन्दसत्रलाई सम्बोधन गर्दै उनले स्वतन्त्र न्यायालयको दुरुपयोगमा राज्य संयन्त्र नै लागेको आरोप लगाए।
उनले न्यायालय नै दुरुपयोग हुनु लोकतन्त्रलाई खतरा भएको बताए।

गत ५ पुसमा प्रतिनिधिसभा विघटन गरेका तत्कालीन प्रधानमन्त्री ओलीले सर्वोच्च अदालतले प्रतिनिधिसभा विघटनको निर्णयलाई बदर गरेको थियो। तर ८ जेठमा ओलीले पुनस् प्रतिनिधिसभा विघटन गरेका थिए। तर सर्वोच्चले ३ साउनमा नेपाली कांग्रेसका सभापति शेरबहादुर देउवालाई प्रधानमन्त्री बनाउन परमादेश दिँदै प्रतिनिधिसभा पुनर्स्थापना गरेको थियो।
त्यसयता नेकपा अध्यक्ष ओलीले न्यायालय विकृत भएको बताउँदै आएका छन्।

यस्तै उनले पार्टीको विचारको एकताका लागि अध्यक्षमा एकता हुन जरुरी भएको बताएका छन्। महाधिवेशनको उद्घाटन कार्यक्रम र विधान महाधिवेशनले आफूहरूलाई उत्साहित बनाएको उनले बताए।

छोटो समयमा वडा र पालिका अधिवेशन सफलताका साथ सम्पन्न गरेकोमा अन्य पार्टीले पनि एमालेकै सिको गरिरहेको उनको भनाइ थियो। ‘‘छोटो समयमा वडा र पालिका अधिवेशन सफलताका साथ सम्पन्न गर्‍यौँ, अन्य पार्टीले पनि हाम्रै सिको गरिरहेको छन्,” उनले भने, ‘‘तर अग्लो मान्छेबाट सिक्न सकिए पनि उचाइ हासिल गर्न सकिदैन।” एमालेले जस्तो अन्य पार्टीले नागरिकलाई आकर्षण गर्न नसक्ने उनले बताए।
प्रतिनिधि छनोटमा केही गुनासो आए पनि सबै समेटिएको दाबी उनले गरे।

नयाँ नेतृत्व चयनका क्रममा सहमतिका आधारमा अघि बढ्नुपर्ने उनको भनाइ थियो।  ‘‘पार्टीभित्र मूल्यांकनका आधारमा प्रतिस्पर्धा हुन्छ, आन्तरिक एकता महत्वपूर्ण हो,” उनले भने, ‘‘प्रतिस्पर्धा प्रतिद्वन्द्वीसँग हुन्छ पार्टीभित्र सहमति हुन्छ।”