उपनिर्वाचनको हिसाब : कांग्रेसलाई क्षति, माओवादी फाइदामा, एमालेमा छैन उत्साह

काठमाडौं । स्थानीय तहका रिक्त ४४ पदको उपचुनावमा अब नतिजा अन्तिम चरणमा छ । तीन ठाउँ सर्वसम्मत भएपछि ४१ स्थानमा मतदान भएको थियो ।

मतदान भएकामध्ये ३७ स्थानको परिणाम आइसकेको छ । ४ स्थानको बाँकी छ । अहिलेसम्म नतिजा सार्वजनिक भएकामध्ये ओखलढुङ्गा र कैलालीका जिसससहित कांग्रेसले १८ स्थानमा जित हात परेको छ ।

उसले वडाध्यक्ष मात्र १६ स्थानमा जितेको छ । माओवादीले ९ स्थानमा जितेको छ । पालिका अध्यक्ष, उपमेयर र उपाध्यक्षसहित माओवादीले ९ स्थानमा जितेको छ ।

हालसम्मको परिणाम अनुसार एमालेले ७ ठाउँमा जित हात परेको छ । यसले दुई पालिका अध्यक्ष, एक उपाध्यक्ष र चारजना वडाध्यक्ष जितेको छ ।

जनता समाजवादी पार्टी नेपालले दुई वडामा जितेको छ । रास्वपा, नेमकिपा, एकीकृत समाजवादी र स्वतन्त्र उम्मेदवारले एक-एक वडामा जित हात पारेका छन् ।

अब कीर्तिपुर नगरपालिकाको मेयर, दोलखाको गौरीशंकर गाउँपालिका उपाध्यक्ष, हुम्ला सर्केगाड गाउँपालिका उपाध्यक्ष र बेलका नगरपालिका वडाध्यक्षको मत परिणाम आउन बाँकी छ ।

पछिल्लो नतिजाअनुसार कीर्तिपुरको मेयर र बेलकाको वडाध्यक्षमा कांग्रेसले अग्रता लिइरहेको छ । सर्केगाड र गौरीशंकरमा माओवादी अगाडि छ ।

कांग्रेसलाई घाटा, माओवादी फाइदामा,एमाले उस्तै 

समग्रमा धेरै स्थानमा जिते पनि कांग्रेस यसपटक घाटामा गएको छ । पहिले जितेका केही महत्त्वपुर्ण पद उसले गुमाएको छ । कीर्तिपुर नगरपालिकाको मेयर बचाउने छ भनेर मान्दा पनि कांग्रेसलाई क्षति नै हुनेछ ।

यो निर्वाचनबाट कांग्रेसले यसअघि जितेका २ गाउँपालिका अध्यक्ष, एक उपाध्यक्ष र एक उपमेयर गुमाएको छ । यस्तै यसअघि उसले जितेका १९ वडाध्यक्षमा चुनाव भएको थियो । त्यो पनि पूर्ति नहुने निश्चित भएको छ ।

माओवादीले २०७९ को चुनावमा जितेकामध्ये ८ स्थान खाली भएर उपचुनाव भएको थियो । अहिलेसम्मको अवस्थामा माओवादी फाइदामा गइसकेको छ । मतगणना भइरहेका दुई ठाउँमा पनि अगाडि छ ।

यसअघि एमालेले जितेका ७ स्थान रिक्त भएका थिए । जुन उसले प्राप्त गरिसकेको छ । गणना भइरहेका स्थानमा पनि उसले टक्कर दिइरहेको छ ।

अघिल्लो पटक स्थानीय तह चुनावमा धेरै ठाउँमा कांग्रेस र माओवादी मिलेर चुनाव लडेका थिए । यसपटक तीन दल छुट्टाछुट्टै प्रतिस्पर्धामा उत्रिएका छन् । माओवादीसँग मिल्दा प्राप्त गरेका सिट यसपटक कांग्रेसले गुमाएको छ ।

एक्लै लड्दा पनि पहिलेभन्दा धेरै सिट जितेर माओवादीले भने साख बचाएको छ । यद्यपी, उसले पहिले जितेका केही क्षेत्र गुमाएको छ भने केही नयाँ ठाउँ जितेको छ ।

एमालेका लागि धेरै क्षति नदेखिए पनि परिणाम उत्साहप्रद छैन । किनकि एक्लाएक्लै लड्दा पनि उसले अपेक्षित फाइदा लिन सकेन । एमालेले एउटा गाउँपालिका अध्यक्ष र एक उपाध्यक्ष कांग्रेसबाट खोस्दा केही वडाअध्यक्ष गुमाएको छ ।

अघिल्लो पटक कांग्रेसले जित्दै आएको केही ठाउँ माओवादीले खोसेको छ । तर, आधार इलाका मानिने रोल्पा, रुकुम र जाजरकोटका केही वडा गुमाएको चिन्ता भने माओवादीमा पनि छ ।

माओवादीले कांग्रेसको गढ मानिने मोरङको ग्रामथान गाउँपालिका अध्यक्ष जितेको छ । गोरखामा पनि एमालेबाट एउटा वडा खोसेको छ ।

अहिलेसम्मको परिणामको अवस्था

पालिका प्रमुख-उपप्रमुख

–काठमाडौंको कीर्तिपुर नगरपालिकामा मेयर पदको लागि मतगणना जारी छ । पछिल्लो परिणाम अनुसार कांग्रेस अगाडि छ । त्यहाँ अघिल्लो पटक कांग्रेसबाटै मेयर निर्वाचित भएका थिए ।

–जाजरकोटको नलगाड नगरपालिका उपमेयर कांग्रेसबाट माओवादीले खोसेको छ । माओवादी केन्द्रकी उम्मेदवार देवका लामिछाने विजयी भएकी छन् । अघिल्लो निर्वाचनमा कांग्रेसकी रसिता सिंह विजयी भएकी थिइन् ।

–मोरङको ग्रामथान अध्यक्ष पनि माओवादीले कांग्रेसबाट खोसेको छ । अहिले माओवादी केन्द्रका नमोनारायण माझी विजयी भएका छन् । यो पालिकामा २०७९ सालमा कांग्रेसले जित्दा माओवादी तेस्रो स्थानमा थियो ।

–दैलेखको महाबु गाउँपालिका कांग्रेसबाट एमालेले हत्याएको छ । नेकपा एमालेका जङ्गबहादुर शाही अध्यक्षमा विजयी भएका छन् । अघिल्लो निर्वाचनमा कांग्रेसका लछुमन गुरुङ विजयी भएका थिए ।

– यस्तै दोलखाको गौरीशंकरको परिणाम आउन बाँकी छ । गौरीशंकर गाउँपालिका उपाध्यक्ष पदमा अघिल्लो निर्वाचनमा कांग्रेसका श्यामसुन्दर तामाङ ४,७४१ मतसहित विजयी भएका थिए । एमालेका मुना सिवाकोटी केसीले ३,२८१ मत ल्याएकी थिइन् । यहाँ अहिले माओवादी अगाडि छ । कांग्रेस तेस्रो स्थानमा छ ।

–हुम्लाको सर्केगाडमा उपाध्यक्षका लागि चुनावमा मतगणना जारी छ । जहाँ अघिल्लो निर्वाचनमा माओवादीका चन्द्रसिंह कार्की ३,२६९ मतसहित विजयी हुँदा एमालेकी जुनकुमारी फडेराले १,०६४ मत पाएकी थिइन् । अहिले पनि माओवादीले अग्रता बनाएको  छ।

–बाजुराको स्वामीकार्तिक खापर गाउँपालिकाको उपाध्यक्ष कांग्रेसबाट एमालेले खोसेको छ । जहाँ सुलोचनाकुमारी भण्डारी बुढा विजयी भएकी छन् ।

–पूर्वी रुकुमको पुथाउत्तरगङ्गा गाउँपालिका उपाध्यक्ष माओवादीले बचाएको छ । यहाँ माओवादीबाट नरपुरा बुढा निर्वाचित भएकी छन्  अघिल्लो पटक यहाँ माओवादी केन्द्रका भूपेन्द्र बुढाले जितेका थिए ।

ओखलढुङ्गाको जिल्ला समन्वय समितिको प्रमुखमा कांग्रेसका टेकराज भट्टराई र कैलाली जिल्ला समन्वय समितिको प्रमुखमा कांग्रेसकै टिकाकुमारी चौधरी भुल निर्विरोध निर्वाचित भएका छन् ।

३३ वडामा कहाँ को ?

कोशी प्रदेश

– अघिल्लो पटक एमालेले जितेको झापाको कन्काई ६ मा अहिले स्वतन्त्र उम्मेदवार लक्ष्मीप्रसाद ओली निर्वाचित भए ।

– तेह्रथुमको लालीगुराँस नगरपालिका–३ को वडाध्यक्ष कांग्रेसले जोगाएको छ । अघिल्लो पटक कांग्रेसकै नगेन्द्र लिम्बु विजयी बनेका थिए ।

– उदयपुरको त्रियुगा नगरपालिका वडा नं १२ को अध्यक्ष कांग्रेसबाट माओवादीले खोसेको छ । माओवादीका नवीनकुमार वान्तता राई निर्वाचित भए ।

– उदयपुरको बेलका नगरपालिका–९ मतगणना जारी छ । यहाँ यसअघि कांग्रेसले जितेको थियो ।

–सुनसरीको गढी गाउँपालिका वडा नम्बर ६ को अध्यक्षमा कांग्रेसका तेतर साहु निर्वाचित भएका छन् । जहाँ अघिल्लो पटक एमालेका सदानन्द उराँव झागर विजयी भएका थिए ।

–ओखलढुङ्गाको मोलुङ गाउँपालिका–५  कांग्रेसबाट एमालेले खोसेको छ । अहिले एमालेका गङ्गाबहादुर तामाङ विजयी भएका छन् ।

–ताप्लेजुङको सिरिजंगा गाउँपालिका–३ मा पनि वडाध्यक्ष कांग्रेसबाट एमालेले खोसेको छ । जहाँ एमालेकी कुमारी साउदेन विजयी भएकी छन् ।

मधेस प्रदेश

मधेस प्रदेशअन्तर्गत ६ वडाध्यक्ष पदका लागि उपनिर्वाचनको नतिजा यस्तो छ ।

–सप्तरीको डाक्नेश्वरी नगरपालिका १ र ४ नम्बर वडामा जसपा नेपालका उम्मेदवार विजयी भएका छन् । अघिल्लो चुनावमा यी दुबै वडा कांग्रेसले जितेको थियो । अहिले १ नम्बरमा जसपाका  धीरेन्द्रकुमार साह र चार नम्बर वडामा देवेन्द्रप्रसाद यादव विजयी भएका छन् ।

–धनुषाको धनुषाधाम नगरपालिका–१ को वडाध्यक्ष कांग्रेसबाट माओवादीले खोसेको छ । जहाँ अहिले माओवादी केन्द्रका शुनीलकापर केवट निर्वाचित भएका छन् ।

–महोत्तरीको रामगोपालपुर–२ माओवादी केन्द्रले जोगाउन सकेन । जहाँ अहिले एमालेका सकिबुल खाँ विजयी भए ।

– रौतहट ईशनाथ नगरपालिका–७ को अध्यक्षमा कांग्रेसका शेख अब्दुल खलिक विजयी भएका छन् । जहाँ एमालेले जित जोगाउन सकेन । अघिल्लो पटक यहाँ एमालेका शेख खलीउल्लाह विजयी भएका थिए ।

– धनुषाको राजपुर नगरपालिका–६ को वडाध्यक्षमा कांग्रेसका समसे आलम विजयी भएका छन् । अघिल्लो पटक पनि कांग्रेसले नै जितेको थियो ।

– रौतहटकै राजपुर नगरपालिका–६ को वडा अध्यक्षमा कांग्रेसका समेस अलाम विजयी भए । यहाँ कांग्रेसले जित जोगाएको छ ।

– रौतहटको गढीमाई नगरपालिका–८ मा नेकपा एकीकृत समाजवादीका बजिरंगप्रसाद यादवले जितेका छन् । जहाँ अघिल्लो पटक जसपा नेपालका रामाज्ञा राय यादवले जितेका थिए ।

बागमती प्रदेश

– काठमाडौं महानगरपालिका –१६ मा रास्वपाले जित हासिल गरेको छ । अघिल्लो पटक कांग्रेसका मुकुन्द रिजालले जितेको सो ठाउँमा अहिले रास्वपाकी रोजिना श्रेष्ठले जितेकी हुन् ।

– काठमाडौं कीर्तिपुरको वडा नम्बर १ मा कांग्रेसले जितलाई निरन्तरता दिन सफल भएको छ । वडाध्यक्षमा कांग्रेस इच्छाकुमार महर्जन विजयी भए ।

– कीर्तिपुरको वडा नम्बर ४ मा कांग्रेसले जित थपेको छ । अघिल्लो पटक स्वतन्त्र उम्मेदवार श्यामकुमार अधिकारीले जितेको ठाउँमा यसपटक कांग्रेसका राजेन्द्र बानियाँ विजयी भए ।

– हेटौँडा उपमहानगरपालिका–१२ माओवादीबाट कांग्रेसले खोसेको छ । अघिल्लो पटक माओवादीका ललितबहादुर घलानले जितेको सो ठाउँमा अहिले कांग्रेसका अर्जुनप्रसाद तिवारीले जित हात पार्न सफल भए ।

– नुवाकोटको ककनी गाउँपालिका–२ मा अघिल्लो निर्वाचनमा कांग्रेसका तिलकबहादुर लामा विजयी भएको ठाउँमा अहिले माओवादीले जितेको छ । अहिले माओवादीका कृष्ण घिमिरेले जितेका छन् ।

गण्डकी प्रदेश

– गण्डकी प्रदेशमा उपनिर्वाचनको एक मात्र केन्द्र गोरखा नगरपालिका–५ हो । जहाँ अहिले माओवादी उम्मेदवार विष्णुबहादुर मगरले जितेका छन् । अघिल्लो निर्वाचनमा एमालेका खिलबहादुर रानाले जितेका थिए ।

लुम्बिनी प्रदेश

– –रुकुम पूर्वको पुथाउत्तरगङ्गा गाउँपालिका–२ को वडाध्यक्ष माओवादी केन्द्रले निर्विरोध जितेको छ । अघिल्लो पटक माओवादीकै उम्मेदवारले जितेका थिए ।

– रोल्पाको रुन्टीगढी गाउँपालिका–४ मा कांग्रेसले नै जितेको छ । कांग्रेसका उम्मेदवार भूपमणि पुन मगर विजयी भएका छन् । पहिले पनि कांग्रेसका टंकबहादुर पुनले जितेका थिए ।

–गुल्मीको मुसिकोट नगरपालिका १ मा कांग्रेसले जित जोगाएको छ । अघिल्लो पटक कांग्रेसका मोहन घिमिरेले जितेको सो ठाउँमा अहिले कांग्रेसका आनन्द श्रेष्ठले जित हात परेका छन् ।

–कपिलवस्तुको शुद्धोधन गाउँपालिका–१ को वडाध्यक्षमा एमालेका मोहम्मद ताहिर मुसलमान निर्वाचित भएका छन् । जहाँ अघिल्लो पटक कांग्रेस विजयी भएको थियो ।

– बर्दियाको ठाकुरबाबा नगरपालिका–४ मा कांग्रेसले जित जोगाएको छ । यसअघि कांग्रेसकै अमिन थारू निर्वाचित भएका थिए ।

कर्णाली प्रदेश

– दैलेखको दुल्लु नगरपालिका १३ को वडाध्यक्षका लागि भएको उपनिर्वाचनमा एमालेका उम्मेदवार लाल बहादुर शाही विजयी भएका छन् । जहाँ अघिल्लो पटक एमाले नै विजयी भएको थियो ।

– कालिकोटको तिलागुफा नगरपालिका–४ को वडाध्यक्षमा नेपाल मजदुर किसान पार्टीका उम्मेदवार खड्कबहादुर शाही विजयी भएका छन् । अघिल्लो पटक माओवादी केन्द्रका परबहादुर शाही विजयी भएका थिए ।

– रुकुम पश्चिमको सानीभेरी गाउँपालिका–५ मा पार्टीको जित जोगाउँदै कांग्रेसका मोतीराम खत्री विजयी भएका छन् ।

– जाजरकोटको कुशे गाउँपालिका– ७ को वडाध्यक्षमा कांग्रेसका उम्मेदवार खम्बबहादुर सिंह विजयी भएका छन् । जहाँ अघिल्लो पटक माओवादीले जितेको थियो ।

– डोल्पाको त्रिपुरासुन्दरी नगरपालिका–५ को वडाध्यक्षमा नेकपा (माओवादी केन्द्र) का नरबहादुर झाँक्री विजयी भएका छन् । अघिल्लो पटक यहाँ एमालेले जितेको थियो ।

सुदूरपश्चिम प्रदेश

–कञ्चनपुरको भीमदत्त नगरपालिका–६ मा कांग्रेस फेरि विजयी भएको छ । कांग्रेसका प्रकाश चन्द विजयी भएका हुन् । अघिल्लो पटक कांग्रेसका महेन्द्र खड्काले जितेका थिए ।

–दार्चुलाको दुहुँ गाउँपालिका–५ को अध्यक्ष माओवादी केन्द्रबाट कांग्रेसले खोसेको छ । कांग्रेसका धनसिंह कुँवर विजयी भएका छन् । अघिल्लो पटक यहाँ माओवादीका मनोरथ भट्टले जितेका थिए ।

–डोटीको पूर्वीचौकी गाउँपालिका–६ मा कांग्रेसका मोहन थापा विजयी भएका छन् । अघिल्लो निर्वाचनमा पनि यहाँ कांग्रेसकै पुष्पराज जोशीले जितेका थिए ।

–बझाङको सूर्मा गाउँपालिका–४ को वडाध्यक्षमा कांग्रेसका धिरेन्द्र पुजारा विजयी भएका छन् । अघिल्लो निर्वाचनमा यहाँ एमालेका सर्जनबहादुर बोहराले जितेका थिए ।