काठमाडौं । बंगालको खाडीमा विकसित न्यूनचापीय प्रणाली शनिबार साँझ नै चक्रवातमा परिणत भई शक्तिशाली चक्रवात बनेको छ ।
सोही चक्रवातको नाम ‘रेमल’ राखिएको छ । यो चक्रवात भारतको पश्चिम बंगाल तथा बंगलादेशको तटीय क्षेत्रतर्फ अगाडि बढिरहेकोे छ ।
रेमल आँधी प्रतिघण्टा १ सय ३५ किलोमिटरका दरले अघि बढिरहेको एनडीटिभीले जनाएको छ ।
चक्रवात अगाडि बढ्दै जाँदा बंगलादेश र पश्चिम बंगालमा चेतावनी जारी गरिएको छ । चक्रवाती आँधी आज राती बंगलादेश र पश्चिम बंगालको तटीय क्षेत्रमा पुगेको छ । रेमलको प्रभावले बंगलादेश र पश्चिम बंगालका तटीय क्षेत्रमा हावाहुरीसहित अहिले वर्षा भइरहेको छ ।
रेमल आँधीका कारण आइतबार दिउँसोदेखि अर्को २१ घण्टासम्म पश्चिम बंगालका विमान स्थलमा उडानहरू रद्द गरिएका छन् ।
रेमलका कारण कोलकाता र दक्षिण बंगालको सडक तथा रेल यातायात समेत प्रभावित भएको छ । राहत र उद्दारका लागि कोलकाता प्रशासनले १५ हजार कर्मचारी परिचालन गरेको छ ।
नेपालमा भने रेमलको सिधा प्रभाव नपर्ने जल तथा मौसम पूर्वानुमान महाशाखाले जनाएको छ । रेमल चक्रवात नेपालको पूर्वी भूभागभन्दा बाहिर नै भएर बहने छ । यसको बाहिरी घेराका केही बादलमात्र नेपालसम्म आइपुग्ने छन् जसका कारण चक्रवातको अप्रत्यक्ष प्रभाव मात्रै पर्ने छ ।
यसको अप्रत्यक्ष असरले नेपालका कोशी, मधेश, बागमती र गण्डकी प्रदेशमा साधारणतयादेखि पूर्ण बदली रही वर्षा हुनेछ । वर्षाका कारण गर्मीबाट आहात भएका तराईका सर्वसाधारणले राहत महशुस गर्ने छन् ।
त्यस्तै, रेमलका कारण उत्तर बिहारका अधिकांश सहरका मानिसहरूले पनि गर्मीबाट राहत पाउने छन् ।
भारतको मौसम विभागले पश्चिम बंगाल, ओडिशा र लगभग सबै उत्तरपूर्वी राज्यहरूमा भारी वर्षा हुने जनाएको छ । रेमलको प्रभाव यी राज्यहरूमा आगामी दुई दिनसम्म रहने बताइएको छ ।
हेर्नुहोस् तस्वीरमा :-
![](https://www.nepalviews.com/wp-content/uploads/2024/05/remal3-scaled.webp)
Facebook Comment
Comment