७६ करोडको सरकारी जग्गा व्यक्तिका नाममा लैजाने नापीका ३७ जना कर्मचारीसहित ३५९ जनाविरूद्ध अख्तियारको मु्द्दा

काठमाडौं । अख्तियार दुरुपयोग अनुसन्धान आयोगले झन्डै ७६ करोडको सरकारी सार्वजनिक जग्गा व्यक्तिका नाममा दर्ता गर्ने नापीका ३७ जना कर्मचारीसहित ३५९ जनामाथि एकैदिन विशेष अदालतमा मुद्दा दायर गरेको छ ।

नापी कार्यालय, चन्द्रगढी, झापाका तत्कालीन प्रमुख नापी अधिकृत विष्णु कुमार न्यौपानेसमेत १७२ जना उपर हालसाविक जग्गादर्ता प्रक्रियाबाट सरकारी सार्वजनिक जग्गा व्यक्ति विशेषको नाममा दर्ता गरी गैरकानूनी लाभ तथा हानी पुर्‍याएकोमा मुद्दा दायर गरिएको हो ।

यस्तै नापी कार्यालय, चन्द्रगढी, झापाकै अर्का तत्कालीन नापी अधिकृत राम देव मण्डल धानुकसमेत १८७ जना उपर स्वबासी जग्गादर्ता प्रक्रियाबाट सरकारी सार्वजनिक जग्गा व्यक्ति विशेषको नाममा दर्ता गरी गैरकानूनी लाभ तथा हानी पुर्‍याएकोमा मुद्दा दायर गरिएको छ ।

एकातिरको जग्गाको मूल्याङ्कन झन्डै ४२ करोड छ भने अर्कातर्फको मूल्याङ्कन ३० करोडभन्दा बढी छ । अख्तियारले व्यक्तिको नाममा गएका ति सबै जग्गा सरकारका नाममा ल्याउन मागदाबी गरेको छ ।

अख्तियारका अनुसार सर्पट नापीको समयमा दमक नगरपालिका वडा नं. १३ र १४ कायम रहेको बालुवाटारको (रतुवा र दिपिनी खोलाको दोभानबाट उत्तरतर्फ) विभिन्न कित्ताको ३८४ रोपनी ८ आना सरकारी जग्गा व्यक्ति विशेषका नाममा दर्ता गरिएको थियो ।

ती जग्गाको न्यूनतम मूल्याङ्कन ४१ करोड बैसठ्ठी लाख हुन आउने भन्दै अख्तियारले १८७ जनाबाट सोहीअनुसार बिगो र जरिवाना असुल उपर गर्न मागदाबी गरेको छ ।

नापी कार्यालय, चन्द्रगढी, झापाका नौ जना कर्मचारी, गैरकानूनी तरिकाले स्वबासी जग्गादर्ता प्रकृयाबाट आफ्नो नाममा दर्ता कायम गरेका ६५ जना र बिगो असुलउपर तथा जग्गा जफत प्रयोजनका लागि मात्र प्रतिवादी बनाइएका ११३ जना गरी जम्मा प्रतिवादीको संख्या १८७ रहेको अख्तियारको विज्ञप्तिमा उल्लेख छ ।

अख्तियारले विज्ञप्तिमा भनेको छ— तपसिलबमोजिमका प्रतिवादीले आफ्नो पदको दुरुपयोग गरी आफू तथा सुरू स्वबासी जग्गा दर्तावालालाई लाभ र सरकारी/सार्वजनिक संस्थालाई हानी पुर्‍याउने बदनियतले सरकारी, सार्वजनिक जग्गा व्यक्ति विशेषको नाममा कायम गरी/गराइ भ्रष्टाचारजन्य कसूर गरेको पुष्टि भएको हुँदा भ्रष्टाचार निवारण ऐन बमोजिमको कसूरमा कैद र बिगोबमोजिमको जरिवानाको सजाय गरी बिगो असुलउपर हुन मागदाबी लिइ विशेष अदालत, काठमाडौंमा आरोपपत्र दायर गरिएको छ ।

यसरी मुद्दा दायर गरिएकामा नापी कार्यालय चन्द्रगढीका तत्कालीन प्रमुख नापी अधिकृत स्व. शशीकान्त झा र निजकी श्रीमती अनार देवी झा, सोही कार्यालयका तत्कालिन नापी अधिकृत राम देव मण्डल, नायव सुब्बा रुद्र प्रसाद श्रेष्ठ, सर्वेक्षक सिताराम यादव लगायत ९ जना कर्मचारी छन् ।

उनीहरूलाई १ करोड ३० लाखदेखि ४१ करोड ६२ लाखसम्मको बिगो कायम गरिएको छ । तल हेर्नुहोस्—

तपसिल

केही प्रतिवादीलाई बिगो असुलउपर गर्ने प्रयोजनको लागि मात्र प्रतिवादी बनाइएको छ। 

तपसिल

 यस्तै झापाकै अर्को जग्गा व्यक्तिका नाममा दर्ता गराएको अभियोगमा १७२ जनाविरुद्ध पनि मुद्दा दायर भएको छ ।

सर्पट नापीको समयमा दमक नगरपालिका वडा नं. १३ र १४ कायम भएको बालुवाटारको (रतुवा र दिपिनी खोलाको दोभानबाट उत्तर तर्फ)को २९ बिगाहा १७ कट्ठा ४ धुर अर्थात ३९७ रोपनी जग्गा व्यक्तिका नाममा घुसाई हालसाविक गरिएकोमा उनीहरूविरुद्ध मुद्दा दायर गरिएको अख्तियारले जनाएको छ । ति जग्गाहरूको न्यनतम मूल्याङ्कन ३४ करोड ६६ लाख हुने पनि अख्तियारले जनाएको छ ।

यो मुद्दामा नापी कार्यालय, चन्द्रगढी, झापाका १० जना कर्मचारी, मालपोत कार्यालय, दमक, झापाका १८ जना कर्मचारीको संलग्नता रहेको भन्दै सबैविरुद्ध न्यूनतम मूल्याङ्कनअनुसारको बिगो असुलउपर तथा जग्था जफत गर्न अख्तियारले मागदाबी गरेर मुद्दा हालेको छ । हेर्नुहोस्—

तपसिल

तपसिल

कानूनी प्रावधानबमोजिम उक्त सरकारी सार्वजनिक जग्गालाई पूर्ववत्‌रूपमा कायम गरी नेपाल सरकारका नाममा ल्याउन अख्तियारले मागदाबी गरेको छ ।