विक्री नभएपछि सयपत्री फूल सडकमा मिल्काउँदै व्यापारी, बालेन शाहसँग आक्रोशित

काठमाडौं । आफूले उत्पादन गरेको सयपत्री फूल विक्री नभएपछि उत्पादक र व्यापारीहरू सडकमा मिल्काउन बाध्य भएका छन् ।

काठमाडौं महानगरपालिकाले व्यावसायिक नभई घुम्ने ठाउँ विक्रीका लागि तोकिदिएपछिआफूहरू फूल मिल्काउन बाध्य भएको उनीहरूले बताएका छन् ।

निर्णयकर्ता महानगरपालिकाका प्रमुख बालेन शाहसँग आक्रोशित उनीहरूले भृकुटीमण्डपका खुला चौर, त्यस वरिपरिका परिसर तथा सडकहरूमा यत्रतत्र फूल र फूलका माला मिल्काएका छन् ।

हजारौं खर्च गरेर काठमाडौं भित्र्याइएको फूल तथा फूलका माला विक्री नभएपछि व्यापारीहरू मिल्काएर हिँडेको प्रत्यक्षदर्शीहरू पनि बताउँछन् ।

महानगरपालिकाका प्रमुख शाहका कारण आफूहरूको फूल विक्री नभएको बताउँछिन् फूल व्यापारी मुना तामाङ । “यत्तिका फूल अब हामीले के गर्ने, झोल पकाएर खान मिलेन । बालेन आएको भए त्यसैलाई माला लगाएर पठाइदिन्थेँ । आएको छैन । उसकै कारण हाम्रो व्यवसाय यस्तो भयो,” मुना आक्रोश पोख्छिन् ।

महानगरले उचित ठाउँ नदिएको कारण आफूहरूले घाटा बेहोर्नुपरेको उनी बताउँछिन् ।

महानगरपालिकाले किनमेल हुने ठाउँभन्दा पनि घुम्ने ठाउँमा फूल विक्री वितरणको लागि स्थान तोकिदिएकाले आफूहरूले ठुलो घाटा बेहोर्नुपरेको बताउँछन् अर्का फूल व्यवसायी रमेशकुमार रम्तेल ।

यस्तो काम गरेर सरकारले नेपालमै केही गर्छु भन्ने युवाहरूका लागि निराशा थपिदिएको उनी बताउँछन् । “यत्रो फूलहरू त्यसै नास भयो । कुहिएर जाने भयो । अब यसको क्षतिपूर्ति कसले दिन्छ,” रम्तेल भन्छन्, “यस्ता कदमहरूले नेपालमै बसेर केही गर्छु भन्नेहरूका लागि पनि धोका हो ।”

घुम्ने ठाउँमा आफूहरूलाई राखिदिएको उनको भनाइ छ । “यो कप्पल घुम्न आउने ठाउँमा फूल बेच्न दिएर हुन्छ रु बालेनले क्षतिपूर्ति दिने हो कि, कृषिमन्त्रीले दिने हो ? किसानलाई यसरी मार्न पाइन्छ ?,” उनी भन्छन् ।

फूल विक्री नभएपछि आफूले ३ लाख रुपैयाँ घाटा बेहोर्नुपरेको उनी सुनाउँछन् । “१५ हजार गाडी भाडा तिरेर सिन्धुलीबाट काठमाडौं फूल ल्यायौँ । अब फेरि १५ हजार तिरेर सिन्धुली लैजानुपर्छ । तीन हजारको व्यापार भएको छैन । मलाई ३-४ लाखको घाटा भयो । मेहनत उसै खेर गयो । अब यसको भर्पाइ गरिदिने को ?’ रम्तेल भन्छन् ।

कुहिएको फूल फाल्दै रम्तेल थप्छन्, “अब यसरी नै फूल फालेर जाने हो, हामी किसानले सडकमा फूल फाल्छौँ । यो सरकारले टिप्छ ।”