कपनमा बालेनले खोलेको खहरेमा दुई पालिकाका स्थानीयबीच झगडा, खोला पुर्न चलखेल (भिडिओ)

काठमाडौं। एक महिनाअघि कपनको खहरे अर्थात् काठमाडौं महानगरपालिका वडा नम्बर ७ र बूढानीलकण्ठ नगरपालिका वडा नम्बर १० को सिमानामा खोलिएको खोलाको विषयमा दुई पालिकाका बासिन्दाबीच झगडा भएको छ।

यहाँ गत साउन २६ गतेपछि खोला उधिनिएपछि फेरि पुर्नुपर्ने वा यत्तिकै छाड्नुपर्ने भन्ने विषयमा विवाद भइरहेको हो।

केही वर्षअघि उक्त खोला खुल्लै थियो। पछि खोला छोपिएर ‘मिलनचोक’ मा परिणत भएको छ। सांसद गगन थापाको निर्वाचन क्षेत्र (काठमाडौं ४) मा पर्ने यो ठाउँमा गत साउनको अन्तिम साता काठमाडौं महानगरले सडक उधिनेर खोला बनाएको हो।

आफ्नो धारमा बग्न नपाएको वर्षाै‌ं भएको खहरे खोलालाई कतै पुरेर बाटो बनाइयो। कतै छोपेर स्ल्याब राखिएको छ। वर्षामा गोकर्ण, जगडोल, कपन गुम्बा हुँदै तेन्जिङ चोकदेखिको पानी आउने गर्छ। जसले गर्दा बर्खामा हरेक दिनजसो बाढी आइरहन्छ।

अहिले खोला खोलिएपछि पनि स्थानीयको घर-घरमा बाढी पस्न रोकिएको छैन। कारण हो- खोलिएको खोलाको बीच-बीचमा कल्भर्ट राखिएको छ। सो कल्भर्टमाथि स्ल्याब राखेर हिँड्ने बाटो बनाइएको छ।

कल्भर्टमाथि स्ल्याब राखेर हिँड्ने बाटो बनाइँदा पानी परेको समयमा बाढी रोकिएर फेरि बस्तीमा पसिरहेको छ। गतराति (शनिबार राति) पनि बस्तीमा बाढी पसेपछि काठमाडौं महानगरपालिका वडा नम्बर ७ र बूढानीलकण्ठ नगरपालिका वडा नम्बर १० का बासिन्दाबीच झगडा भएको हो।

काठमाडौं महानगरबासी भन्छन्, ‘‘हामीले घर बनाउँदा मापदण्डअनुसार बाटो र सडक छाडेर बनाएका छौँ। यसैले हाम्रोतर्फ खोला किनारामा सडक छ। यसैले खोलाको बीचमा राखिएको कल्भर्ट भत्काउन चाहन्छौँ।  तर, उता (बुढानीलकण्ठ)पट्टिकाले घर बनाउँदा खोलातर्फ सडक छाडेका छैनन्। यसकारण घरमुनि खोला छ। उनीहरूको घर जाने बाटो छैन। यसैले खोलामाथि कल्भर्ट र स्लाब राख्न पाउनुपर्छ भनिरहेका छन्। उनीहरूको कल्भर्ट खोलामा राख्दा फेरि बाढी पसिरहेको छ।’’

अहिले बूढानीलकण्ठका स्थानीयले भने खोलामा बक्स कल्भर्ट हालेर पुर्नुपर्ने माग गरिरहेका छन्। बूढानीलकण्ठका स्थानीय भन्छन्, ‘‘हाम्रोतर्फ आउने बाटो भएन। बाटो बनाउनलाई खोला पुर्नुपर्छ। बक्स कल्भर्ट हालेर खोला छोपेर बाटो बनाउनुपर्छ।’’

तर, काठमाडौं महानगरबासीले भने खहरे खोला खुला राख्नुपर्छ, पुर्नुहुँदैन भन्दै आएपछि दुई पक्षबीच विवाद भएको हो।

सो क्षेत्रमा खोलालाई लिएर दुई पालिकाको वडाहरूबीच वर्षौंदेखि विवाद चल्दै आएको छ। बूढानीलकण्ठ १० कपनको माथिल्लो भागमा पर्छ।

काठमाडौं महानगरपालिका वडा नम्बर ७ साततले तल्लो भेगमा पर्छ। माथिल्लो भेगबाट आएको पानीले तल्लो भेगमा सधैं बाढी आउने गर्छ।

यहाँ दुई वडाबीच मात्र होइन दुई वडाका स्थानीयबीचसमेत मतभेद छ । काठमाडौं महानगरको वडा नम्बर ७ का स्थानीय यो खहरे खोला हो भन्छन्। तर, बुनपा १० का स्थानीय खोला भए मुहान हुनुपर्ने तर्क गर्छन्।

वडा नम्बर ७ का स्थानीयहरूले वडा नम्बर १० कै कारण आफूहरू बर्सेनि बाढीको चपेटामा परेको गुनासो गरेका छन्। उनीहरू जसरी हुन्छ मिचेको खोला फर्काउनुपर्ने बताउँछन्।

साततलेका स्थानीय भन्छन्, ‘‘यो खहरे खोला नै हो। हामीले वर्षौंदेखि दु:ख पाइरहेका छौँ । खोलाले आफ्नो धारमा बग्न पाउनुपर्छ खोला खुला राख्नुपर्छ खोला पुर्नुहुँदैन।’’