पूर्वका बाढीपहिरो प्रभावितलाई तत्काल उद्धार र राहतका लागि सांसदहरूको माग

काठमाडौं। पूर्वका बाढी पहिरो प्रभावितलाई तत्काल राहत र उद्धार गर्न सांसदहरूले माग गरेका छन् ।  प्रतिनिधिसभा सदस्यहरूले  वर्षापछि आएको बाढी पहिरोले पूर्वी पहाडी जिल्लामा ठूलो जनधनको क्षति भएको भन्दै तत्काल राहत, उद्धार र क्षतिपूर्तिको व्यवस्था गर्न माग गरेका हुन्।

आइतबार प्रतिनिधिसभा बैठकमा बोल्दै कांग्रेस सांसद दीपक खड्का र योगेश भट्टराईले सभामुखमार्फत राहत र उद्धार गर्न सरकारको ध्यानाकर्षण गराएका हुन् ।

‘सङ्खुवासभामा बाढी पहिरोमा परि सुपर हेवामा काम गर्ने मजदुरहरू बेपत्ता भएका छन् । तीन जना घाइते र एक मृत भेटिएका छन्’, खड्काले भने, ‘यसबाहेक विभिन्न ठाउँमा मानिस हराइरहेको सूचना छ । थुप्रै हाइड्रोपावर क्षति भएका छन् । तीनवटा पक्की पुल बगाएको छ । खरबौँको क्षति भएको छ ।’ उनले क्षतिग्रस्त जिल्लाहरूमा तत्काल उद्धार र राहत पुर्याउन सभामुखमार्फत सरकारको गम्भीर ध्यानाकर्षण गराए ।

त्यस्तै, एमाले सांसद योगेश भट्टराईले केही दिन देखिको अविरल वर्षाले पूर्वी पहाडका ताप्लेजुङ, तेह्रथुम सङ्खुवासभा र पाँचथर लगायतका जिल्लामा ठूलो जनधनको क्षति भएको बताए ।

उनले ताप्लेजुङमा ५ जना बेपत्ता भएको भन्दै कति मानिसहरू घर छोडेर बस्न बाध्य भएको, कतिपय घर र विद्यालय भवन जोखिममा परेको ,दोभान बजारका दुई दर्जन घर जोखिममा परेको तथा मेची राजमार्गको पुवा खोलाको पुल अवरुद्ध भएको भन्दै सरकारलाई तत्काल राहत र उद्धारमा ध्यान पुर्याउन माग गरे ।

त्यस्तै अर्का सांसद रामकुमार राईले पनि बाढी पहिरोले पूर्वी पहाडी सङ्खुवासभा लगायतका जिल्लामा भएको ठुलो जनधनको क्षति भएको भन्दै अहिलेसम्म १७ जना बेपत्ता, नौ जनाको मृत्यु भएको खबर आएको भन्दै बेपत्ताहरूको खोजविन गर्न सरकारसँग माग गरे ।