पश्चिमका केही ठाउँमा पानी पर्दै, दिउँसो कोशी र बागमती प्रदेशमा भारी वर्षाको सम्भावना

नेपालभ्युज

काठमाडौं । देशमा स्थानीय र पश्चिमी वायुको प्रभावले विहानैदेखि बदली भएको छ ।

देशका धेरैजसो ठाउँमा मौसम बदली भइरहेकोमा पश्चिमका केही ठाउँमा बिहानैदेखि पानी परिरहेको छ । मौमस पूर्वानुमान महाशाखाका अनुसार सुदूरपश्चिम, कर्णाली, लुम्बिनी र गण्डकी प्रदेशका केही ठाउँमा पानी परिरहेको छ ।

अहिले पश्चिमी क्षेत्रमा सक्रिय रहेको न्यूनचापीय प्रणाली बिस्तारै पूर्वतर्फ सरिरहेको छ । दिउँसो देशका धेरै ठाउँमा पानी पर्ने अनुमान छ ।

बाग्मती र कोशी प्रदेशका एक दुई ठाउँमा दिउँसो ठूलो वर्षाको अनुमान रहेको छ । तराईमा पनि धेरै ठाउँमा पानी पर्ने र केही ठाउँमा तीव्र हावाहुरी चल्ने महाशाखाले जनाएको छ ।