चट्याङ पर्दा एउटै फर्मका ५४ वटा भेडा मरे, सुसारे घाइते

नेपालभ्युज

पाँचथर। पाँचथरको फालेलुङ गाउँपालिका–३ मा चट्याङ पर्दा एउटै फर्मका ५४ वटा भेडा मरेका छन् । चट्याङ लागेर स्थानीय प्रकाश राई, टेकबहादुर गुरुङ र सुरेन्द्र आङ्बोको फर्ममा रहेका १२ वटा भेडा भने घाइते भएका छन् ।

भेडा फर्मको स्याहार सुसारमा जुटेका याङबरक–३ निवासी प्रेम राई सख्त घाइते भएको जिल्ला प्रहरी कार्यालय पाँचथरले जनाएको छ।

राईलाई शरीरमा बाहिरी चोट नदेखिए पनि शरीरको दाहिने पाटो नचल्ने र बोल्न नसक्ने अवस्थामा फेला पारी उपचारका लागि फालेलुङ स्वास्थ्य चौकी पठाइएको जिल्ला प्रहरी कार्यालय पाँचथरले जनाएको छ।

भेडा मर्दा किसानलाई १५ लाखभन्दा धेरैको क्षति भएको प्रहरीको प्रारम्भिक अनुमान छ ।