पाकिस्तानको स्वात उपत्यकामा विष्फोट, १५ जनाको मृत्यु

एजेन्सी।पाकिस्तानको स्वात उपत्यकामा रहेको आतंकवाद विरोधी विभागको कार्यालयमा भएको विष्फोटमा परी कम्तीमा १५ जनाको मृत्यु भएको छ ।
मृत्यु हुनेमा अधिकांश प्रहरी रहेका छन् । विष्फोटबाट आतंकवाद विरोधी कार्यालयको भवन ध्वस्त भएको छ । भग्नावशेषमा पुरिएका मानिसलाई निकाल्ने काम पनि भइरहेको छ ।

स्वात प्रहरीले आतंकवाद विरोधी विभागको कार्यालयमा भएको विस्फोट आतंकवादी कार्य नभएको जनाएको छ ।विस्फोटमा ५३ जना घाइते भएका छन् । जसमध्ये आठ जनाको अवस्था गम्भीर छ । घाइते सबैको अस्पतालमा उपचार भइरहेको छ ।

यहाँ राखिएको हतियारमा विद्युत सट सर्किट भएर आगो लागेको थियो । पाकिस्तानी तालिबान समूहले हालैका दिनहरूमा यहाँ सुरक्षा बलहरूमा धेरै आक्रमणहरू गरेको छ। तर उसले यस विस्फोटको जिम्मेवारी भने लिएको छैन ।

स्वात उपत्यकामा आतंकवाद विरोधी अभियान चलिरहेको छ । जसका कारण यहाँ सुरक्षा बलको उल्लेख्य उपस्थिति रहेको छ। सन् २०१२ मा आतंकवादीहरूले नोबेल पुरस्कार विजेता मलाला युसुफजाईलाई यस उपत्यकामा आक्रमण गरेका थिए।