काठमाडौं। बानेश्वरमा आफैंमाथि पेट्रोल खन्याएर आत्मदाह गरेका इलामका प्रेम प्रसाद आचार्यको परिवारले बिमा बापतको ५० लाख दाबी भुक्तानी पाएको छ ।
सन नेपाल लाइफ इन्स्योरेन्स कम्पनीले आचार्यको परिवारलाई ५० लाख १२ हजार १ सय ९४ रुपैयाँको मृत्यु दाबी भुक्तानी गरेको जनाएको छ । बिमा प्राधिकरणले इन्स्योरेन्स गर्दाको अवस्था र नियमित बिमा शुल्क भुक्तानी गरे नगरेको बुझेर दाबी दिनु भनेको थियो ।
बिमा कम्पनीले सूर्योदय नगरपालिका इलामको मेयर, उपमेयर, वडाअध्यक्ष तथा कम्पनीको तर्फबाट प्रदेश १ का प्रमुख तुलसीनाथ पौड्यालको रोहबरमा मृतक आचार्यकी श्रीमती नानुका अधिकारीलाई दाबी बापतको रकमको चेक हस्तान्तरण गरेको हो ।
आचार्यले २०७७ मंसिर २ गते कम्पनीमार्फत ५० लाख रुपैयाँको धनञ्जय बिमा पोलिसी खरिद गरेको र कम्पनीलाई दुई किस्तामार्फत ६ लाख ९३ हजार ६ सय रुपैयाँ बिमा शुल्क बुझाएका थिए ।
धन फिर्ता ‘मनी ब्याक’ बिमा पोलिसी भएकाले आचार्यले यस अगाडि प्राप्त गरेको दाबी रकमलाई कट्टा गरी उक्त रकम दिएको कम्पनीले जनाएको छ ।
गएको माग १० गते आचार्यले बानेश्वरस्थित संसद भवन अगाडि आफैंलाई आगो लगाएका थिए । उपचारको क्रममा माघ ११ गते उनको मृत्यु भएको थियो । आत्मदाह गर्नुअघि आचार्यले सामाजिक सञ्जालमा ‘व्यवसाय गर्दा डुबेको र त्यसमा राज्यको नीतिहरू दोषी रहेको’ उल्लेख गरेका थिए ।
Facebook Comment
Comment