काठमाडौं। कर छुटका नाममा व्यापारीसँग लाभ लिएर मिनाहा गरेको आरोप लागेका आन्तरिक राजस्व विभागका तत्कालीन महानिर्देशक चुडामणि शर्माविरुद्ध विशेष अदालतमा दर्ता रहेका भ्रष्टाचारसँग सम्बन्धित तीनवटा मुद्दामा मंगलबार साक्षी बुझ्ने आदेश भएको छ ।
मुद्दा दर्ता भएको झन्डै साढे ५ वर्षपछि न्यायाधीश श्रीकान्त पौडेल, यमुना भट्टराई र शालिग्राम कोइरालाको इजलासले मंगलबार उक्त आदेश गरेको हो ।
कर फर्छ्योट आयोगका पदाधिकारी रहेका शर्मासहित अध्यक्ष लुम्बध्वज महत र सदस्य उमेशप्रसाद ढकालविरुद्ध २०७४ साउन १ गते विशेष अदालतमा मुद्दा दर्ता भएको थियो । त्यतिवेला शर्मा पक्राउ परेका थिए । उनीहरुविरुद्ध १० अर्बभन्दा बढीको बिगो माग गर्दै मुद्दा दर्ता भएको थियो ।
२०७४ माघ १५ गते अकुत सम्पत्ति आर्जन गरेको भन्दै शर्मा र उनकी श्रीमती कल्पनाविरुद्ध पनि विशेष अदालतमा अर्को मुद्दा दर्ता भएको थियो । २०७८ असार ९ गते शर्मा, महत र ढकालविरुद्ध राजस्व चुहावटमा करिब एक अर्ब ३३ करोड बिगो दाबी गर्दै अर्को मुद्दा दायर भएको थियो ।
Facebook Comment
Comment