कांग्रेसको कार्यसम्पादन समिति बैठक विना निष्कर्ष टुंगियो, पदाधिकारी बैठक बस्दै

काठमाडौं। नेपाली कांग्रेसको समानुपातिक पद्धतितर्फको सांसद चयनका लागि बसेको केन्द्रीय कार्यसम्पादन समिति बैठक विना निष्कर्ष टुंगिएको छ । समानुपातिक पद्धतिबाट चयन गर्नुपर्ने तीन जना पुरुषका लागि धेरै जनाको दाबी रहेपछि कार्यसम्पादन समितिको बैठकले टुंगो लगाउन नसकेको हो ।

शनिबारै बालुवाटारमा बस्ने पार्टीको पदाधिकारी बैठकले सांसद चयन गर्ने एक पदाधिकारीले बताए । शनिबारको बैठक समानुपातिकतर्फको पुरुषका लागि विमलेन्द्र निधि, गोपालमान श्रेष्ठ, डा. प्रकाशशरण महत, जीवन परियार, फरमुल्लाह मन्सुरलगायत आ-आफ्नो क्लस्टरको पहिलो स्थानमा रहेका नेताहरू आकांक्षी छन् ।

समानुपातिक निर्वाचन पद्धतितर्फ कांग्रेसले ३२ सिट पाए पनि  संघीय संसदमा ३३ प्रतिशत महिला प्रतिनिधित्व गराउन समानुपातिक पद्धतिबाट २९ जना महिला चयन गर्नुपर्ने बाध्यता कांग्रेसलाई छ ।

तर बैठकमा सहमति जुट्न नसकेको र सभापति शेरबहादुर देउवा अर्को कार्यक्रममा जानुपर्ने भएकाले बैठक स्थगित गरिएको एक पदाधिकारीले बताए ।