जुवाडेलाई समाउँदा गाली गर्ने महिलासहित ३३ जना पक्राउ

हेटौंडा। मकवानपुर प्रहरीले गए राति बागमती प्रदेशको राजधानी हेटौंडाबाट जुवा खेलिरहेका ३३ जनालाई पक्राउ गरेको छ । हेटौंडा उपमहानगरपालिका वडा नम्बर–११ नवलपुरबाट जुवा खेलिरहेका ३३ जनालाई गएराति प्रहरीले पक्राउ गरेको हो ।

गएराति पौने १२ बजेको समयमा हारजित हुनेगरी जुवा खेल हुदैछ भन्ने विशेष सूचनाको आधारमा अस्थायी प्रहरी पोस्ट थानाभर्याङ र जिल्ला प्रहरी कार्यालय मकवानपुरबाट गएको प्रहरी निरीक्षकको टोलीले हेटौडा—११ नवलपुरस्थित बैकुण्ठ बलामीको घरमा रहेको ग्यारेजमा लुकेर जुवा खेलिरहेको अवस्थामा पक्राउ गरेको हो ।

उनीहरूको साथबाट प्रहरीले ७३ हजार रुपैयाँ नगद रकमसमेत बरामद गरेको जिल्ला प्रहरी कार्यालय मकवानपुरका प्रहरी उपरीक्षक वामदेव गौतमले बताए ।

प्रहरीले जुवाको खालबाट कौडा १३ थान, तास १३ बुक र नगद ७३ हजार रुपैयाँ बरामद गरेको र जुवा तास खेल्ने, च्याँखे थाप्ने ३३ जना पुरुष र प्रहरीलाई अभद्र व्यवहार गर्ने एक महिलासहित जम्मा ३४ जना लाई नियन्त्रणमा लिएको प्रहरी उपरीक्षक गौतमले बताए ।

तिहारको बिदा भएकाले प्रहरीले हालसम्म मुद्दा दर्ता गर्न बाँकी रहेको छ । अदालत खुल्नेबित्तिकै मुद्दा दर्ता गरिने प्रहरी प्रशासनले बताएको छ । पक्राउ परेकाहरूको नाम प्रहरीले खुलाएको छैन । पैसा हारजित हुनेगरी कौडा खेलिरहेको भन्ने सुराकीका आधारमा प्रहरीले उनीहरूलाई पक्राउ गरेको हो ।

कौडा खेलेको आरोपमा पक्राउ पर्नेहरू सबैजना पुरुष रहेका छन् । तिहार रमाइलो गरी खेलेर मनाउने नाममा पैसा हारजित हुनेगरी कौडा खेल्नेहरू भने अहिले प्रहरी खोरमा परेका छन् । यसैगरी, जुवा खेलिरहेकाहरूलाई पक्राउ गर्न पुगेको प्रहरीसमक्ष अभद्र व्यवहार गर्ने अर्की एक जना महिलालाई पनि प्रहरीले पक्राउ गरेको छ ।