लगातार पाँचौँ खेलमा पनि बार्यन म्युनिखसँग बार्सिलोना निरीह

नेपालभ्युज

काठमाडौं। स्पेनिस क्लब बार्सिलोना लगातार पाँचौँ खेलमा पनि जर्मन क्लब बार्यन म्युनिखसँग निरीह बनेको छ । च्याम्पियनस लिग फुटबलमा बुधबार विहान भएको खेलमा बार्सिलोना बार्यन म्युनिखसँग २-० गोलले पराजित भयो । उसका लागि हर्नान्डेज र सानेले गोल गरे । सन् २०१५ यता बार्यनसँग भएका पाँच वटा खेलमा बार्सिलोना सबैमा पराजित भएको छ ।

जितसँगै बायर्न समूह ‘सी’ मा दुई खेलबाट ६ अङ्क जोडेर शीर्षस्थानमा छ । यही समूहको अर्को खेलमा इटालियन क्लब इन्टर मिलानले पहिलो जित निकालेको छ । उसले चेक क्लब भिक्टोरिया प्लेजेनलाई २–० ले हरायो ।

अर्को खेलमा लिभरपुलले आजक्सलाई २–१ गोलले हराएको छ । त्यस्तै स्पोर्टिङसँग टोटनह्याम २–० गोलले पराजित भएको छ । पोर्टोलाई क्लब बुर्जले ४–० गोलको फराकिलो अन्तरले हराएको छ । मार्सेल्लीलाई इन्ट्राच फ्रान्कफर्टले १–० गोल तथा लिभरकुसेनले एट्लेटिको मड्रिडलाई २–० गोलले हराएको छ ।