SKIP

भिजिट भिसामा खाडी जान लागेका १ सय ९७ जना विमानस्थलबाटै फर्काइए, मानव तस्करीको आशंका

पर्यटक भिसा लिइ खाडीका विभिन्न देशमा जान त्रिभुवन अन्तर्राष्ट्रिय विमानस्थल पुगेका १ सय ९७ जना नेपालीलाई प्रहरीले फर्काएर अनुसन्धान थालेको छ ।

नेपालभ्युज

काठमाडौं। पर्यटक भिसा अर्थात भिजिट भिसा लिएर खाडीका विभिन्न देशमा जान त्रिभुवन अन्तर्राष्ट्रिय विमानस्थल पुगेका १ सय ९७ जना नेपालीलाई प्रहरीले फर्काएर अनुसन्धान थालेको छ ।

आवश्यक कागजात शंकास्पद देखिएकोले थप अनुसन्धानका लागि तालुक नेपाल प्रहरी प्रधान कार्यालय, मानव बेचबिखन अनुसन्धान ब्यूरो, बबरमहलमा बुझाइएको अध्यागमन विभागले जनाएको छ ।

भदौको ८ देखि ११ गतेसम्म विभिन्न एयरलाइन्सको उडानद्वारा पर्यटक भिसा लिइ खाडी देशतर्फ प्रस्थान गर्न लागेका यात्रुहरुलाई त्रिभुवन अन्तर्राष्ट्रिय विमानस्थलको प्रस्थान क्षेत्रमा जाँच गर्दा हवाई यात्रा अनुमति कागजातहरु शंकास्पद देखिएका महिला १ सय ३ र पुरुष ९४ गरी जम्मा १ सय ९७ जना यात्रुहरुलाई मानव बेचबिखन अनुसन्धान ब्यूरोमा बुझाइएको हो ।