गलकाेट । १० वर्षे सशस्त्र द्वन्द्वको उद्गम स्थलको रूपमा रहेको बागलुङको ताराखोलाका सहिद, बेपत्ताका परिवार तथा घाइतेलाई गाउँपालिकाबाट मासिक भत्ता प्राप्त गर्ने भएका छन् । ताराखोला गाउँपालिकाले द्वन्द्वको क्रममा भएका सहिद, बेपत्ताका परिवार, घाइते तथा अपांगलाई मासिक भत्ता दिने भएको छ ।
पालिकाले गाउँसभाबाट नीति तथा बजेटमा सो कुरा समावेश गरेको थियो । गाउँपालिकाको कार्यपालिका बैठकबाट भत्ता वितरणको नीति बनाएर पारित गरेकाले आगामी महिनादेखि सहिद, बेपत्ताका परिवारलाई मासिक भत्ता दिन थाल्ने ताराखोला गाउँपालिकाले जनाएको छ ।
गाउँपालिकामा सशस्त्र द्वन्द्वका क्रममा राज्यको तर्फदेखि २१ जना सहिद र दुईजना बेपत्ता भएका थिए भने विद्रोही माओवादीको तर्फबाट चार जना सहिद गरी २७ जनालाई मासिक एक हजार ५०० का दरले भत्ता दिने निर्णय गरेको ताराखोला गाउँपालिकाका अध्यक्ष धनबहादुर विकले जानकारी दिए ।
गाउँपालिकामा ११ जना द्वन्द्वको क्रममा गम्भीर घाइते भएका छन् भने अन्य केही सामान्य घाइते भएका छन् । यस्तै, पालिकाले विद्रोही तथा राज्यका पक्षबाट भौतिक संरचना गुमाएको परिवारलाई रोजगारी दिने गरी नीति ल्याएको छ ।
Facebook Comment
Comment