अमेरिकी राजदूत बेरीले गरे जनकपुरधाममा छठ पूजा

‘‘जनकपुरमा पुनः आउन पाउँदा आफूलाई भाग्यमानी महशुस गरेको छु। छठ पर्वमा उज्यालो गतिविधि देख्न पाउँदा आभारी पनि छु’’, उनले भने, ‘‘मलाई यो ठाउँले सधैं प्रभावित तुल्याएको छ।’’

नेपालभ्युज

जनकपुरधाम। अमेरिकी राजदूत र्‍यान्डी जे बेरीले जनकपुरधाममा पुगेर छठ पर्वमा सहभागी हुँदै पूजा गरेका छन्। उनले जनकपुरधामको गंगा सागर छठ घाटमा पूजा आराधना गरेका हुन्।

उनी दूतावासका अन्य कूटनीतिज्ञसहित छठ मनाउन त्यहाँ पुगेका थिए।

राजदूत बेरीसँगै अमेरिकी सहयोग नियोग यूएसएडका नेपाल निर्देशक सेप्डी पनि छठ मनाउन जनकपुर पुगेका थिए। आफूले त्यहाँ ठेकुवा र पुरीको स्वाद चाखेको समेत राजदूत बेरीले जनाएका छन्।

राजदूत बेरीले सबै जनालाई छठ पर्वको शुभकामना समेत दिएका छन्। राजदूत बेरीले दशैंँ र तिहार पनि मनाउँदै शुभकामना दिएका थिए। उनी नेपाली चाडपर्व मनाउन सक्रिय छन्।