विमानस्थलको सर्भर डाउन हुँदा चार उडान प्रभावित, सयौँ यात्रु मर्कामा

काठमाडौँ। त्रिभुवन अन्तर्राष्ट्रिय विमानस्थलस्थित अध्यागमन कार्यालयको सफ्टवेयर डाउन (बिग्रिँदा) हुँदा चार वटा अन्तर्राष्ट्रिय उडान प्रभावित भएको छ। जसबाट कम्तीमा ५ सय यात्रु प्रभावित भएका छन्।

सर्भर बिग्रिएका कारण कोरियाको सेउलबाट आएको कोरियन एयर, दिल्लीबाट आएका भारतीय वायुसेवा भिस्तारा, इन्डिगो र नेपाल वायुसेवाका यात्रुले सास्ती बेहोर्नु परेको विमानस्थल प्रमुख प्रेम नाथ ठाकुरले बताए।

बुधबार दिउँसो ३ बजेर ५१ मिनेटमा अध्यागमनको सर्भर बिग्रिएपछि उडानमा ढिलाइ भएको हो। खासमा इन्टरनेट र हवाई उडानको सबन्ध हुँदैन। तर इन्टरनेट सर्भर बिग्रिएपछि विदेश जाने र फर्किने यात्रुलाई अध्यागन कार्यालय सेवा दिन नसकेपछि उडान प्रभावित भएको हो।

विदेश जाने र फर्किएका व्यक्तिको बारेमा इन्टरनेटमा डाटा राख्नुपर्ने भएकाले उडानमा प्रभावित भएको बताइएको छ। गृह मन्त्रालयमा रहने जीआइडीसी नामको सर्भरले काम नगर्दा चार वटा अन्तर्राष्ट्रिय वायुसेवाका कम्तीमा ५ सय यात्रुलाई समयमै पासपोर्टमा छाप लगाउने, भिषा दिने, जरिवाना तिराउने लगायत राहदानीसँग सम्बन्धित सेवा समयमै दिन नसकिएको अध्यागमन प्रमुख पुष्प शाहीले बताए। करिब डेढ घण्टापछि साँझ साढे ५ बजे मात्रै सर्भर बनेपछि यात्रुहरू उड्न पाएका थिए।

विमानस्थलमा अध्यागमनको सर्भर बिग्रिएको यो तेस्रो पटक हो।