अभिनेत्री दीपिका कक्कडलाई दोस्रो स्टेजको क्यान्सर

काठमाडौं । बलिउड अभिनेत्री दीपिका कक्कडलाई क्यान्सर भएको छ ।

सामाजिक सञ्जालमार्फत अभिनेत्रीले आफू दोस्रो स्टेजको क्यान्सरबाट पीडित भएकी जानकारी दिएकी छन् ।

दीपिकाले लेखेकी छिन्, “तपाईंहरू सबैलाई थाहा छ, पछिल्ला केही हप्ताहरू हाम्रो लागि कठिन थिए । पेटको माथिल्लो भागमा अत्यधिक दुखाइ भएर अस्पताल जाँदा, मेरो कलेजोमा टेनिस बल आकारको ट्युमर भएको थाहा पाएँ र त्यसपछि थाहा पाएँ कि यो ट्युमर दोस्रो चरणको क्यान्सर हो । यो हामीले देखेको र अनुभव गरेको सबैभन्दा कठिन समय हो । म यसको सामना गर्न र पूर्ण साहसका साथ यसलाई पार गर्न सकारात्मक र दृढ छु । मेरो परिवार पनि यसमा मसँगै छ र तपाईंहरू सबैले निरन्तर माया र प्रार्थना पठाइरहनुभएको छ । हामी यसबाट पार पाउनेछौं । मलाई तपाईंको प्रार्थनामा सम्झनुहोस् ।”

पोस्ट सेयर गरेदेखि, फिल्म र टिभी उद्योगसँग सम्बन्धित व्यक्तिहरू दीपिका कक्कडको शीघ्र स्वास्थ्यलाभको लागि निरन्तर प्रार्थना गरिरहेका छन् ।

दीपिकाका श्रीमान् शोएब इब्राहिमले आफ्नो युट्युब च्यानलमा एउटा भिडिओ पोस्ट गरेका छन्, जसमा उनले फ्यानहरूलाई आफूलाई क्यान्सरको बारेमा कसरी थाहा भयो भनेर बताएका छन् । शोएबले दीपिकालाई पछिल्ला केही दिनदेखि निरन्तर पेट दुखिरहेको बताएका छन् । जब उनले परीक्षण गराइन्, उनलाई ट्युमर भएको पत्ता लाग्यो ।

दीपिकाको केही समयअघि शल्यक्रिया गर्नुपर्ने थियो, जसमा यो ट्युमर हटाउनुपर्ने थियो, तर यसैबीच अभिनेत्रीलाई उच्च ज्वरो आयो जसका कारण उनको शल्यक्रिया स्थगित गरियो ।

अब यो ट्युमर दोस्रो चरणको क्यान्सर भएको पत्ता लगाएको छ । दीपिकाले भ्लगमा भनेकी छिन्, “डाक्टरहरूले उनलाई यो क्यान्सर धेरै सजिलै निको हुन सक्ने आश्वासन दिएका छन् । चिन्ता लिनुपर्ने केही छैन ।”

दीपिका ससुराल सिमर का, अगले जनम मोहे बिटिया ही किजो, कहाँ हम कहाँ तुम जस्ता टिभी शोमा देखा परेकी छिन् । यसबाहेक उनी नच बलिये, झलक दिखला जा र बिग बोस १२ जस्ता रियालिटी शोको हिस्सा रहेकी छिन् । दीपिका बिग बोस १२ को विजेता पनि हुन् ।