यू–१९ महिला टी–२० विश्वकप छनोट : कुवेतविरुद्व पहिला ब्याटिङ गर्दै नेपाल

काठमाडौं । आईसीसी यू–१९ महिला टी–२० क्रिकेट विश्वकप एसिया छनोटको दोस्रो खेलमा नेपालले कुवेतविरुद्व पहिला ब्याटिङ गरिरहेको छ ।

यूएईको द सेभेन क्रिकेट रङ्गशालामा जारी आजको खेलमा नेपालले टस जितेर कुवेतविरुद्व पहिला ब्याटिङ गर्ने निर्णय लिएको हो ।

यो समाचार तयार पार्दासम्म नेपालले १५ ओभरको समाप्तिमा ३ विकेट गुमाएर ९८ रन बनाएको छ ।

बुधबारदेखि सुरु भएको प्रतियोगितामा नेपालले आफ्नो पहिलो खेल थाइल्यान्डसँग खेलेको थियो । बुधबारको खेलमा नेपालले थाइल्यान्डलाई ६७ रनको फराकिलो अन्तरले पराजित गर्दै विजयी सुरुवात गरेको हो ।

कुवेत र यूएईबीच भएको पहिलो खेलमा युएईले १०६ रनको अन्तरले कुवेतलाई हराएको थियो । प्रतियोगितामा आयोजक युएईसहित नेपाल, कुवेत र थाइल्यान्ड सहभागी छन् । सहभागी चार टोलीमध्ये शीर्ष स्थान हासिल गर्ने टोली विश्वकपमा छनोट हुनेछ ।

विश्वकप क्रिकेट प्रतियोगिता अर्को वर्ष मलेसियामा आयोजना हुँदैछ ।