भुक्तानी नपाएका व्यवसायीले गरे लुम्बिनी क्षेत्रको गेटमा अवरोध, कोषको कार्यालय तालाबन्दी गर्ने चेतावनी

लुम्बिनी । १० महिनादेखि भुक्तानी नपाएपछि निर्माण व्यवसायीहरूले आज लुम्बिनी विकास क्षेत्रको प्रवेशद्वार बन्द गरेका छन् ।

मायादेवी मन्दिर प्रवेश गर्ने ठाउँसहित अरू संरचना अवलोकनको लागि जाने गेटहरूमा अवरोध गरिएको छ ।

व्यवसायीहरूले निर्माण सामग्री तथा ट्रयाक्टर, क्रेन लगेर गेटमा अवरोध गरेको छन् ।

विकास क्षेत्र प्रवेश गर्ने मुख्य गेट ४ नम्बर गेटसहित ३, ८ र ९ नम्बरको साइड गेट बन्द गरेर प्रदर्शन भइरहेको छ । व्यवसायीहरूले भुक्तानी प्रक्रिया छिटो अघि बढाउन दबाब दिन आज लुम्बिनीको गेट अवरोध गरेका हुन् ।

भोलिसम्म भुक्तानी नभएमा कोषको कार्यालयमै तालाबन्दी गर्ने व्यवसायीहरूले चेतावनी दिएका छन् ।

यसअघि उनीहरूले मुख्यमन्त्री कार्यालयसहित विभिन्न सरकारी निकायमा ध्यानाकर्षण पत्र बुझाउँदै भुक्तानी नमिलेसम्म काम रोक्ने निर्णय सार्वजनिक गरेका थिए ।

आइतबारदेखि भने ठेकेदारहरूले भुक्तानी माग्दै कोषको कार्यालयमा आइतबार धर्ना दिएका हुन् । यथाशीघ्र भुक्तानीको माग गर्दै निर्माण व्यवसायीहरूले शुक्रबारदेखि सम्पूर्ण निर्माण कार्य रोकिसकेका छन् ।

लुम्बिनी विकास कोष अन्तर्गतका परियोजनाहरूलाई राष्ट्रिय गौरवका रूपमा चिनाइएको भए पनि भुक्तानी प्रक्रियामा भएको ढिलाइले परियोजनाहरू संकटमा छन् ।

भुक्तानी नपाउँदा लुम्बिनीका निर्माण व्यवसायी आर्थिक संकटमा, निर्माणका काम ठप्प (वक्तव्यसहित)

यस राष्ट्रिय गौरवको आयोजनाअन्तर्गतका विभिन्न परियोजनामा लुम्बिनी–एनके–खड्का कृष्ण जेभी, लामा–एपेक्स–कमलजित जेभी, रमन–गजुरमुखी–रामजानकी जेभी र खानी–अर्घाखाँची–बबुल जेभी कार्यरत छन् ।

व्यवसायीहरूले भुक्तानी प्रक्रिया छिटो अघि बढाउन र आन्तरिक विवादहरू समाधान गर्न माग गरेका छन् ।

यदि कोषले समयमा भुक्तानी नगरेमा अहिले रोकको काम र बन्द गरेको कार्यालय नखोल्ने चेतावनी दिएका छन् ।

भुक्तानी नपाएपछि लुम्बिनी विकास कोषको कार्यालयमा निर्माण व्यवसायीको धर्ना