उपसभामुखबारे एमाले- संसद्ले जे गर्छ, त्यसमा पूर्ण समर्थन गर्छौँ

काठमाडौं । सत्तारूढ दल नेकपा (एमाले) ले उपसभामुख इन्दिरा रानामाथि उठेका प्रश्नमा स्वयम् रानाले नै स्पष्ट पार्नुपर्ने बताएको छ ।

शुक्रबार बसेको केन्द्रीय सचिवालय बैठकपछि महासचिव शंकर पोखरेलले यस्तो बताएका हुन् । “यो संसद्को मामिलाको कुरा हो, संसद्लाई कसरी मर्यादित बनाउने भन्ने कुराचाहिँ संसदीय दल र संसद्ले गर्ने काम हो । त्यहाँ पार्टीको पूर्ण समर्थन रहन्छ,” उनले भने ।

अगाडि उनले भने, “एमालेको मान्यता उहाँमाथि उठेका प्रश्नहरूको बारेमा उहाँको पार्टी र उहाँ आफैँले स्पष्ट गर्नुपर्छ भन्ने हो । वास्तवमा उहाँबारे जे कुरा बाहिर आएका छन्, ती सत्य हुन् भने उहाँ त्यो पदका लागि उपयुक्त होइन भन्ने कुरा स्पष्टै छ । यद्यपि जसरी अहिले बाहिर चर्चामा आएको छ, त्यो हिसाबले के गर्ने भन्नेबारे निष्कर्षमा पुगिसकेका छैनौँ ।”

संसद्‌मा भने एमाले सांसदहरूले उपसभामुख रानाको राजीनामा नै माग गरेका छन् । प्रमुख सत्ता साझेदार दल नेपाली कांग्रेसले त राजीनामा मागिसकेको छ । सत्तारूढ गठबन्धनमा रहेका अन्य साना दलहरूले पनि कांग्रेस-एमालेकै मागलाई सदर मानेका छन् ।

यता प्रमुख प्रतिपक्ष दल दल नेकपा (माओवादी केन्द्र), विपक्षी दलहरू राष्ट्रिय स्वतन्त्र पार्टी (रास्वपा), नेकपा (एकीकृत समाजवादी) लगायतले भने त्यसको प्रतिवाद गरेका छन् । उपसभामुख रानाले पनि कांग्रेस-एमालेले भन्दैमा आफूले राजीनामा नदिने अडान कसेकी छन् ।

• सम्बन्धित समाचार

एमालेको ‘मिसन ८४’ अभियान: सबै सदस्यले हरेक वर्ष एउटा कक्षा लिनैपर्ने