एमालेको ‘मिसन ८४’ अभियान : सबै सदस्यले हरेक वर्ष एउटा कक्षा लिनैपर्ने

काठमाडौं। नेकपा एमालेले पार्टीको संगठनात्मक सुदृढीकरण र आगामी चुनावको तयारीलाई मध्यनजर गर्दै १८ बुँदे वार्षिक कार्ययोजना पारित गरेको छ ।

पार्टीको केन्द्रीय सचिवालयको बैठकले महासचिव शंकर पोखरेलद्वारा प्रस्तावित यो कार्ययोजनालाई शुक्रबार अनुमोदन गरेको हो ।

वार्षिक कार्ययोजनामा सदस्यता नवीकरण र विस्तारदेखि ४० वर्ष मुनिका युवाहरूका लागि शिखर सम्मेलन आयोजनासम्मका विभिन्न महत्वपूर्ण विषयहरू समेटिएका छन् ।

यस योजनाअनुसार एमालेका सबै सदस्यले हरेक वर्ष अनिवार्य रूपमा कम्तीमा एउटा कक्षा लिनुपर्ने व्यवस्था गरिएको छ । महासचिव पोखरेलले पार्टीलाई बलियो र निर्णायक राष्ट्रिय शक्तिका रूपमा स्थापित गर्न यो कार्ययोजना महत्त्वपूर्ण भएको बताए ।

१८ बुँदे कार्ययोजना यस प्रकार छन्:

१. सदस्यता नवीकरण, विस्तार र अभिलेखीकरण: पार्टी सदस्यता नवीकरण, विस्तार तथा अभिलेखीकरणलाई प्रभावकारी बनाइनेछ।

२. नियमित अधिवेशन आयोजना: कात्तिकभित्र बाँकी जिल्ला कमिटी र मंसिरभित्र सबै कमिटीको अधिवेशन सम्पन्न गरिनेछ।
३. नेता र कार्यकर्तालाई जिम्मेवारी: अन्य पार्टीबाट प्रवेश गरेका र अधिवेशनमा पराजित भएका नेता तथा कार्यकर्तालाई तीन महिनाभित्र जिम्मेवारी दिइनेछ।
४. कामको मूल्यांकन गर्ने विधि: कार्यकर्ताको कामको मूल्यांकनको विधि बसालिनेछ।
५. कमिटी परिचालन र व्यवस्थापन प्रणाली: पार्टी कमिटी परिचालन र अन्तरविरोध व्यवस्थापनको प्रणाली निर्माण गरिनेछ।
६. पार्टी स्कूल अभियान: पार्टी स्कूल सञ्चालनलाई अभियानको रूपमा चलाइनेछ। प्रत्येक सदस्यले वर्षमा कम्तीमा एउटा कक्षा लिनुपर्नेछ।
७. सरकार र जनप्रतिनिधिको प्रभावकारिता: जनप्रतिनिधिहरूको कामको मूल्यांकन गरी जनतालाई जानकारी गराइनेछ।
८. पार्टी कार्यालयहरूको व्यवस्थापन: केन्द्रदेखि वडासम्मै पार्टी कार्यालयहरूको प्रभावकारी व्यवस्थापन गरिनेछ।
९. प्रचारमा सोसल मिडिया प्रयोग: प्रचारलाई व्यवस्थित गर्न सोसल मिडिया नेटवर्किङ अनिवार्य गरिनेछ।
१०. कामका नयाँ क्षेत्र पहिचान: जिम्मेवारी नपाएका सदस्यहरूलाई नयाँ क्षेत्रमा परिचालन गरिनेछ।
११. वार्षिक बजेट र स्रोत परिचालन: प्रत्येक कमिटीले वार्षिक बजेट तयार पारेर स्रोत परिचालन तथा आम्दानी र खर्चको व्यवस्थापन गर्नेछ।
१२. पार्टी जीवनको शुद्धीकरण र सुदृढीकरण: पार्टी जीवनको शुद्धीकरण र सुदृढीकरणलाई अभियानका रूपमा अगाडि बढाइनेछ।
१३. मिसन ८४ को तयारी: सबै कमिटीले बलियो र निर्णायक राष्ट्रिय शक्ति निर्माण तथा मिसन ८४ मा बहुमत प्राप्त गर्ने योजना बनाउनेछ।
१४. प्रवासी काम: प्रवासीबीचको कामलाई देश हितको पक्षमा परिचालन गरिनेछ।
१५. केन्द्रीय कार्यालय भवन निर्माण: पार्टीको आफ्नै केन्द्रीय कार्यालय भवन निर्माण गरिनेछ।
१६. ७५ वर्षको अवसरमा अधुरा काम सम्पन्न: नेकपा स्थापनाको ७५ वर्षको अवसरमा अघि सारिएका अधुरा कामहरू सम्पन्न गरिनेछ।
१७. नियमित रिपोर्टिङ प्रणाली: पार्टीमा नियमित रिपोर्टिङ प्रणालीलाई व्यवस्थित गरिनेछ।
१८. युथ समिट आयोजन: ४० वर्षमुनिका युवाहरूका लागि युथ समिट आयोजना गरिनेछ।