राखेपद्वारा भलिबल कभर्डहल निर्माणका लागि उपसमिति गठन

काठमाडौं। राष्ट्रिय खेलकुद परिषद् (राखेप)ले भलिबल कभर्डहल निर्माणस्थल छनौट तथा तयारीका लागि तीन सदस्यीय उपसमिति गठन गरेको छ ।

अन्तर्राष्ट्रिय स्तरको प्रतियोगिता आयोजना गर्न सकिने सुविधा सम्पन्न कभर्डहलको निर्माणका लागि जग्गा प्राप्ति र आवश्यक तयारीका लागि भलिबल संघका अध्यक्ष जीतेन्द्रबहादुर चन्दको संयोजकत्वमा उपसमिति गठन गरिएको हो ।

राखेपका सदस्यसचिव स्तरीय निर्णयबाट गठन भएको उपसमितिले विभिन्न सरकारी निकाय तथा स्थानीय तहसँग समन्वय गरी उपयुक्त जग्गा छनौट गरी प्राप्तिका लागि प्रारम्भिक चरणको कार्य गर्नुपर्ने छ ।

यस्तै, जग्गा तय भएपछि विसं २०८१ असोजभित्र डीपीआरको लागि आधार तयार गर्ने उपसमितिलाई कार्यदेश दिइएको छ । उपसमितिले कार्यदेश अनुसारको काम सम्पन्न गरी ३० दिनभित्र परिषद्‌मा प्रतिवेदन पेश गर्नु पर्ने उल्लेख गरिएको छ ।

त्रिपुरेश्वरस्थित कभर्डहलमा अन्तर्राष्ट्रिय प्रतियोगिता आयोजना तथा अभ्यासका लागि पर्याप्त नभएकोले सुविधा सम्पन्न कभर्डहल निर्माण आवश्यक भएको राखेपले जनाएको छ ।

राष्ट्रिय खेल भलिबललाई थप व्यवस्थित बनाउँदै आकर्षण बढाउने उद्देश्यले सुविधा सम्पन्न हल निर्माणका लागि पहल थालिएको राखेपका सदस्य सचिव टंकलाल घिसिङले जनाएका छन् ।

उपसमितिमा अन्तर्राष्ट्रिय भलिबल रेफ्री गौतम प्रसाद लासिवा र राखेपका इन्जिनियर शिवचन्द्र यादव सदस्य छन् ।