वृद्धभत्ताको रगताम्य लोभ: भत्ता थापेको थाहा पाएपछि लुट्न जाँदा मारेर भाग्ने युवा पक्राउ

सिन्धुपाल्चोक । सिन्धुपाल्चोकको बाह्रबिसे बस्ने ७१ वर्षीया रत्नकुमारी थापाको घरमा शुक्रबार बिहान अचानक कोलाहल मच्चियो । एकाबिहानै छिमेकीहरू दौडेर आउँदा रत्नकुमारीको शव रगताम्य अवस्थामा फेला पर्यो‍ ।

घटनाले छिमेकी सबैलाई स्तब्ध बनायो । प्रहरी अनुसन्धानबाट खुलासा भयो कि यो हत्या लुटपाटको उद्देश्यले गरिएको थियो ।

रत्नकुमारीले केही दिनअघि मात्र बृद्धाभत्ताको रकम १२ हजार रुपैयाँ बुझेकी थिइन् । केही दिनअघि छोरीले ५० हजार रुपैयाँ सापटी फिर्ता लिएकी थिइन् । सबैगरी करिब ६२ हजार रूपैयाँ र करिब ३ तोला सुन पनि लुटेको थाहा भयो ।

झ्यालबाट छिरेर पैसा र गहना लुटेको र आफ्नो पोल खुल्ने डरले हत्या गरेको आरोपमा स्थानीय ३६ वर्षीय सञ्जीव देउजालाई प्रहरीले काठमाडौंबाट पक्राउ गर्यो‍ ।

आफ्नो पोल खुल्ने डरले कुटपिट गरी हत्या गरेर उनी काठमाडौं भागेको सिन्धुपाल्चोक प्रहरी प्रमुख एसपी सन्तोष खड्काले जानकारी दिए । ‘उनले पैसा र गहना लुटेपछि आफ्नो पहिचान खुल्ने डरले हत्या गरेको बयान दिएका छन्’ उनले खड्काले भने ।

रत्नकुमारीको निर्मम हत्या गरेर फरार सञ्जीव काठमाडौंको गोंगबुमा लुकेर बसेका थियो । घटनाको चार दिनपछि, साउन २१ गते बिहान उनी पक्राउ परेका हुन् । वृद्धाको हत्यालाई लिएर सदनमा समेत कुरा उठेपछि प्रहरीमाथि दबाब बढैको थियो ।