लामाले बागमती प्रदेशको मुख्यमन्त्रीमा आज दाबी पेश गर्दै, भोलि नियुक्त हुने

काठमाडौं । बागमती प्रदशेसभामा नेपाली कांग्रेस संसदीय दलका नेता बहादुरसिंह लामाले सोमबार मुख्यमन्त्रीमा दाबी पेश गर्दैछन् ।

प्रदेश प्रमुख यादवचन्द्र शर्माले नयाँ सरकार गठनका लागि आइतबार आह्वान गरेसँगै एमालेको समर्थनमा लामाले मुख्यमन्त्रीमा दाबी पेस गर्न लागेका हुन् ।

मुख्यमन्त्री शालिकराम जम्कट्टेलको दिएको राजीनामा आइतबार नै स्वीकृत भइसकेको छ ।

नयाँ मुख्यमन्त्री चयनको प्रक्रिया सुरु भइसकेकाले सोमबार बिहान बहुमत प्रदेशसभा सदस्यहरुको हस्ताक्षरसहित प्रदेश प्रमुख समक्ष मुख्यमन्त्रीको दाबी पेस गर्न लागिएको कांग्रेस सांसद रामकृष्ण चित्रकारले जानकारी दिए ।

लामाको नियुक्ती भने मंगलबार साँझ ५ बजेपछि मात्रै हुनेछ । सरकार गठनका लागि दाबी पेस गर्न मंगलबार साँझ ५ बजेसम्मको समय तोकिएको छ ।

नयाँ सत्तासमीकरण बनेसँगै बागमतीमा अब चौथोपटक एमाले र कांग्रेसको गठबन्धन सरकार बन्नेछ ।

नयाँ सरकारमा एमालेले ७ वटा मन्त्रालय मागेको छ । मन्त्रालय भागबन्डाको विषय टुंगिन बाँकी रहेको चित्रकारले बताए ।

समीकरण बदलिएसँगै जमकट्टेल साढे ६ वर्षपछि सत्ताबाट बाहिरिएका छन् ।

प्रदेशको पहिलो कार्यकालको पाँच वर्ष आन्तरिक मामिला तथा कानुन मन्त्रालय र आर्थिक मामिला तथा योजना मन्त्रालय चलाएका जम्कट्टेल प्रदेशको दोस्रो कार्यकालमा तीन पटकसम्म विश्वासको मत पाएर मुख्यमन्त्रीमा टिकेका थिए ।