कैलाश सिरोहियालाई धनुषा अदालत उपस्थित गराइयो, सुरक्षा व्यवस्था कडा

जनकपुरधाम । हिजो पक्राउ परेका कान्तिपुर मिडिया ग्रुपका अध्यक्ष कैलाश सिरोहियालाई म्याद थपका लागि धनुषा जिल्ला अदालतमा उपस्थित गराइएको छ ।

अदालत आसपासको सुरक्षा व्यवस्था निकै कडा बनाएर सिरोहियालाई अदालत लगिएको हो ।

बाक्लो सङ्ख्यामा त्यहाँ प्रहरी परिचालन भएका छन् । बाहिर केही पक्षले पक्राउको विरोधमा नाराबाजी गरिरहेका छन् ।

अदालत लैजाने क्रममा प्रहरीले घेरा हालेको थियो । अदालतमा प्रवेशमा समेत कडाइ छ ।

नागरिकता कीर्ते सम्बन्धी कसुरमा अनुसन्धानका लागि भन्दै हिजो प्रहरीले पक्राउ गरेको थियो । काठमाडौंमा पक्राउ गरिएपछि धनुषा लगिएको थियो ।

कैलाश सिरोहिया पक्राउपछि बोल्यो अमेरिकी दूतावास, ‘अझ परिपूर्ण मुलुक’ बन्न प्रेस स्वतन्त्रता महत्त्वपूर्ण हुने तर्क

अध्यक्ष सिरोहियालाई पक्राउ गर्न प्रहरीको टोली हिजो मंगलबार कान्तिपुर कार्यालयको आठौं तलाको कार्यकक्षमै पुगेको थियो । उपत्यका अपराध अनुसन्धान कार्यालय काठमाडौंका एसएसपी सानुकुमार भट्टराई र एसपी रवीन्द्र रेग्मीसहितको टोली बर्दीसहितका प्रहरी अधिकृत लिएर कार्यकक्षमा प्रवेश गरेका थिए ।

मंगलबार मात्रै कान्तिपुरमा गोर्खा मिडियामा चार सहकारीको ९५ करोड ८१ लाख अपचलन, उपप्रधान तथा गृहमन्त्री रवि लामिछाने कम्पनीमा प्रबन्ध निर्देशक भएको अवधिमा मात्रै सहकारीहरूबाट ८० करोड ३१ लाख रुपैयाँ गोर्खा मिडियामा आएको दस्ताबेजबाट पुष्टि शीर्षकमा समाचार छापेको थियो ।

लगत्तै बिहानैदेखि कान्तिपुरको कार्यालय परिसर र थापाथली सडकमा समेत ठूलो संख्यामा प्रहरी परिचालन गर्दै साँझ पक्राउ गरेको हो ।