नबिल बैंक वीरगन्ज शाखाबाट ४\५ बोरा पैसा चोरी, वेल्डीङ गर्ने मेसिनले टिनको बक्सा काटेको सीसीटीभी फुटेज

वीरगन्ज । नबिल बैंकको वीरगन्जको बाइपास रोडमा रहेको शाखाबाट एक करोड ३४ लाख ६५ हजार रुपैयाँ चोरी भएको छ । आइतबार राति बैंकको ताल्चा फुटाई चोर भित्र प्रवेश गरेको भन्दै बैंकले मंगलबार जिल्ला प्रहरी कार्यालय पर्सामा जाहेरी दिएको हो ।

प्रहरीका अनुसार सीसीटीभी फुटेजमा वेल्डीङ गर्ने मेसिनले टिनको बक्सा काटेर पैसा चोरी गरेको देखिएको छ । चोरले टिनको बक्सा फुटालेर एक सय र बीस रुपैयाँको नोट चोरेका प्रहरी नायव उपरीक्षक कुमार विक्रम थापाले बताए ।

उनले भने, ‘सय र बीसको नोट राखिएको टिनको बक्सा काटेर पैसा चोरी भएको देखिएको छ ।’ अनुसन्धानमा खटिएका प्रहरीका अनुसार चोरले ४÷५ वटा बोरामा हालेर पैसा लगेका छन् ।

सोमबार चोरी भएको पैसा एकिन गरि बैंकले मंगलबार प्रहरीमा जाहेरी दिएको हो । बैंकमा भएको चोरीको घटनाको सम्बन्धमा अनुसन्धान अगाडि बढेको छ ।