भिजिट भिसामा दुबई जान लागेका तीनजना युवतीसहित एक एजेन्ट पक्राउ

काठमाडौं । भिजिट भिसामा दुबई जान लागेका तीन जना यात्रु र एक एजेन्ट विमानस्थलबाट पक्राउ परेका छन् । त्रिभुवन अन्तर्राष्ट्रिय विमानस्थलबाट बिहीबार राती उनीहरु पक्राउ परेका हुन् ।

हिमालय एयरलाइन्सको फ्लाइटबाट उनीहरू दुबई जान लागेका थिए । घरेलु कामदारको रुपमा काममा लगाउन प्रतिव्यक्ति २ लाख रुपैयाँ लिएर एजेन्टले दुबई पठाउन लागेका थिए ।

त्रिभुवन अन्तर्राष्ट्रिय विमानस्थल प्रहरी कार्यालयका प्रमुख एसएसपी कृष्णहरि शर्माका अनुसार पक्राउ परेका चारै जनालाई काठमाडौं उपत्यका अपराध अनुसन्धान कार्यालयमा अनुसन्धानका लागि पठाइएको छ ।

पक्राउ पर्नेमा एजेन्ट भविलाल थापा छन् । भिजिट भिसामा जान लागेका तेह्रथुमकी नेत्रकुमारी गुरुङ, अर्घाखाँचीका हरि उपाध्याय, चितवनका दुर्गा श्रेष्ठ छन् । एजेन्टको मोबाइलबाट विगतमा पनि उनले पैसा उठाएर भिजिट भिसामा पठाउने गरेको प्रमाणहरू भेटिएको छ ।

यसअघि भिजिट भिसामा मानव तस्कर गर्ने गिरोहका धेरै जना पक्राउ परेका थिए । भिजिट भिसामा नेपाली पैसा उठाएर विदेश पठाउने गरेको अभियोगमा अध्यागमनका नौ अधिकृतसहितलाई प्रहरीले मुद्दा चलाएको थियो ।