काठमाडौं। रुसको जेलमा एलेक्सी नाभाल्नीको मृत्यु भएसँगै विश्वको विभिन्न सहरमा विरोध तथा श्रद्धाञ्जली भइरहेको छ।
राजनीतिक अभियन्ता नाभाल्नीका समर्थकहरु विश्वका प्रमुख सहरमा रहेका रुसी राजदुतावासअगाडि जम्मा भएका छन् । समर्थकहरुले लन्डन, पेरिस, जेनेभा र न्यूयाेर्कमा प्रदर्शन गरेका छन् ।
जर्मनीकाे राजधानी बर्लिनमा भएको प्रदर्शनमा रुसी राष्ट्रपति भ्लादिमिर पुटिनविरुद्ध आवाज उठाए । लण्डनस्थित रुसी राजदूतावासमा भएको प्रदर्शनमा प्रदर्शनकारीहरु ‘नभाल्नी हाम्रो हिरो हुन्’ जस्ता संकेतहरु लिएर प्रदर्शनमा उत्रिएका थिए ।
जेनेभास्थित संयुक्त राष्ट्रअगाडि १०० जनाभन्दा बढी मानिस उभिएका थिए । नाभाल्नीको पोट्रेटमा सबैले फूल पनि चढाए । नाभाल्नीको मृत्युविरुद्ध रुसमा पनि विरोध भइरहेकाे छ।
रुसकाे राजधानी मस्को र सेन्ट पिटर्सबर्गस्थित स्मृतिहरुमा पनि मानिसहरुले फूल अर्पण गरेका छन् । साथै, रुसका सहरहरुमा भएकाे विरोधमा १०० भन्दा बढी व्यक्तिलाई प्रहरीले नियन्त्रणमा लिएको बीबीसीले जनाएको छ।
नाभाल्नीको श्रीमती युलियाले श्रीमानको मृत्युबारेको खबरमा सत्य भएको वा नभएकोबारे आफु अनविज्ञ रहेको बताइन् । यदि मृत्यु भएमा त्यसको कारण पुटिन हुने युलियाले बताइन् ।
नाभाल्नीको टोलीले उनको वकिललाई कारगारमा पठाउने तयारी गरेको छ । यससँगै विश्वबाट नै नेताहरुले नाभाल्नीको मृत्युबारे विभिन्न टिका-टिप्पणी गरेका छन्।
अमेरिका राष्ट्रपति जो बाइडेनले नाभाल्नीको मृत्युमा पुटिन जिम्मेवार भएको प्रतिक्रिया दिए । बेलायतका विदेश सचिव डेभिड क्यामरुनले सो मृत्युको परिणामहरु देखिने टिप्पणी गरे ।
यूक्रेनका राष्ट्रपथि भोलोदिमिर जेलेन्स्कीले नाभाल्नीलाई पुटिनले मारेको आरोप लगाए ।
शुक्रबार नाभाल्नीको ४३ वर्षको उमेरमा मृत्यु भएको थियो । फाइनान्सियल टाइम्सका अनुसार शुक्रबार जेलभित्रै हिँडेक्रममा उनी एक्कासी बिरामी परेका थिए । बेहोस भएका उनको त्यही मृत्यु भएको जेल प्रशासनले जनाएको छ ।
डाक्टरहरु तुरुन्तै पुगेपनि बचाउन नसकिएको दाबी प्रशासनको छ । नाभाल्नीले १९ वर्षको जेल सजाय काटिरहेका थिए । उनी सन् २०२१ मा जेल परेका थिए ।
Facebook Comment
Comment